San Martín de Trevejo - Caceres

Romance al pilón del Chafaril, en el verano del 2009, cuando dejó de caer agua por los caños de su fuente.


CHAFARIL ROMANCE

Lágrimas cumu limôs
me seyan dos ollus, cuandu
un-ha tardi vi en o foru,
dó chafaril o retratu.

¿Pâ que esa fonti se morra
que circunstancias s´han dáu?
Habría que mirar por ver
si o manantial se ha desviáu.

Os que hemus vistu esa fonti,
sempris con agua manandu,
antis, inclusu de felsi,
a casa d´os buticarius.

Os que hemus inchíu o barril
y saltáu pa eital un tragu,
y a vedis nos hemus queidu,
y nos hemus queau pingandu.

A nosostrus, ia maioris,
vendu esi pilón vadau,
nos entra un-ha desazón,
nos queamus meiu angustiáus.

Cuantas vedis hemus díu,
en tardis d´o mes de maiu
a eital algun-hos partíus
en aquel pequenu llanu.

Xiugaban os mozus grandis,
os pequenus, os medianus.
Algun-has vedis vulvías
con os pés esfarrapáus.

Aunque aquel campu de xiugu
nun era reglamentariu,
a nosotrus nos valía,
y pasábamus o ratu.

Cuandu vulvíamus pa casa
meiu mortus y descalzus,
nos mollábamus os pés
i eitábamus un bô tragu.

Con agua tan cristalina,
que seia d´aquelis canus,
recuperabas as forzas,
nâ maís que beberas algu.

Y as herbas que alí cricían
en o ponti, por debaxiu;
secas, mustias y marchitas,
vemus que se están queandu.

¡Y esas tablas colocás,
pa poñel cubus y cántarus!
Cuandu menus te dés conta,
algun-ha s´habrá cuarteau.

¿Y que me didis d´os burrus
vacas, múas y cabalus?
Están bebendu en as boigas
agua en pucheirus de barru.

Y a imagin d´a nosa luna
alí se había reflejau;
agora nun hay espellu:
¡y esa luna está chorandu!.

Mérruas, pardáis, andurinhas,
y otrus páxiarus d´o campu,
alí bibían agua limpa
y dispois seian volandu.

Algún d´elis se levaba
a vedis, un gorronadu.
Agô nun se vé ningún;
ia se foran pâ otru láu.

En o lugal s´han pirdíu
- ¿qué ques que te diga Pacu?,
coisas que tíñamus antis
sabis ben de que te falu. -

As fraguas ya se perderan,
os lagaris han cerráu;
ia tampocu hai lagareirus
y otrus uficius de antaño.

¿Inda quea algún cesteiru?
¿hai quin arregli o calzáu?.
Pensu que nun hai barbeiru:
a xienti ten pelu largu.

En o campu nun hai naidi,
os d´a Serra s´han baxiau.
O caminhu d´a Pastora
s´encontra meiu atoráu.

Ya nun quean cerrumiclis,
ni cotorras ni milanus,
y é difícil encontrar
picabarrennus o gaius.

En o conventu, fai mutu
que nun se oivi ninhún salmu;
con un-has obras que han feitu,
en hotel o han transformáu

Hai máis coisas que se foran
¡y pensamus que é un aiantru!
Si agó se perdi o pilón
¿qué vamus a fel? ¡Dios Santu!

Cualquel mañegu de ben,
sempris ha consideráu
o pilón d´O Chafaril
cumu si fora sagráu.

Debemos alzal a vó
nun puemus cruzal os brazus.
Que o pilón nun teña agua
¿nun será coisa de humanus?.

En parti tú tés radón,
- pero pensa, amigu Nandu -,
que aunque mutas coisas faltan
otras mutas nos han queáu.

Nos quea esi falal mañegu
dos ancestrus heredáu;
nos quea o pilón dá praza
y esa torri campanariu

As campanas cuandu tañin
algun-ha morti anunciandu;
o nos avisan de festa
o nos chaman a rebatu.

Tamén nos quea San Martinhu
alí arriba en o retablu;
esi que rompei a capa,
p´axiual a un necesitáu.

Nun nos falta a Crú Bindita,
en sua ermita p´alí abaxiu;
esi Cristu que, sin presas,
sempris nos está esperandu.

Vamus a pili con fé
pâ que nos sirva de faru:
asína o didi o letreiru
en a ermita colocáu.

Nos levi por bôs camiñus,
y nos asenti en bôs práus;
que se acabi esta siquía
sin tel que sacal os Santus.

Que teñáis soidi, y que coñozáis (coñozamus), esi pilón otra vé cheu.

B_RODAS

Brodas, dos canus do pilon nun cai ni gota,pero os meis ollus se han amuliciu, eris un fenomenu.Un abrazu

Impresionanti!!, vaya repasu que as feitu desde a tua niñez hasta oiyi dia, creu que nun te a queau na por nombral en esas rimas, feliciais!!.
Según as diva lendu me diva imaginandu esis dagalitus iugandu en aquela plazoleta antis do ponti, y verdadeiramenti cuántas generaciós habremus pasau bebendu por aquelis canus.
Y he certu que inda nos quean mutas coisas y por muta siquia que haya nun nos a poirán quitar, cumu e o nosu mañegu y o amor por a nosa terra, por o nosu pueblu, isu nun o deixaremus perdel...

San pirdiu mutus traballus, meis aguelus feian chocolati, y tos os uficius que en esas rimas contas, pero inda de boca a boca se van contandu anécdotas, vivencias de tántus que ya nos han deixau, pero que con o sei recordu de parentis, amigus y cuñucius, en mutas ocasiós se revivin esis momentus, esis ditus, y esis chascarrillus que nos contan, creu que esis recordus das persoas do lugal, dos nosus antepasaus, é o legau máis bonito que nos han deixau, esis son os bienis que nos han trasmitiu y que intentémus que entre tos nun se perda.
Tú con esas rimas o estás demostrandu y con elas cuántus recordus trairás a tantus y tantus que as leerán.

Y a terminación que fais en elas, sempris contandu con a nosa Cru Bindita, que a uiviu a tantus y tantus esas peticiós cheas de fé y de cariñu, y ¿quin sabi si entre esas peticiós nun estábamus tos nosotrus?, pa os que temus fé, sabémus que pa Cru Bindita nun existi o tempu toas as coixas son presentis pa Él, y si antis piran por nos, cumu tu ben didis, vamus a pili por os que veñan detrás, y que sea sempris a nosa Guía.

Muta soidi pa tos y pa Fala

mye

Hai que vixital mutas localiais de "Foro Ciudad", pa encontral contertulius/as comu eno nosu.

-¡Muñu!, ¿buscabas un candidatu pa nombral o milhol furista do anu?.-¡Pues ben,aquí está!.

Sugieru: qu’o filhu de "Tiu Lorenzu o Zapateiru"; sea nombrau o milhol furista do anu.Esti nombramentu,se fairía oficial ena proxima muvía que según pareci se l’está dandu forma . -En cuantu a mí se refieri, solu tendis qu’abril a boca pa ponhelmi a funcional.

Cerrumicli: estoi con vos, o nosu Lugal é pequenu; peru os homis que dalí han séidu, se tenin que mil con cinta métrica; pues,o metru normal nún chega. Claru está,qu’istu nún ha síu gracias a agua do Chafaril, sinon o vinhu dos Ameais.

Soidi a tos.

Fonti Nova

PD. mye: claru qu’a nosa Crú nos protegerá sempris; ela i os manhegus son inherentis.

Apoyu en to a propuesta de FONTI NOVA,BRODAS se mereci to, con esas rimas que fay creu que ten gaña a m ayoria de esti Foru,creu que por a eday soy o decanu do Foro y estoy de acordu con to que Brodas di en suas poesias.Nun olviemus a CANCHEIRA que tamen feya muy boas rimas,si he precisu o nombramus tamen a titulu Postumo,pero a verday que o recordu con sentimentu,pues de verday que tiña muta amistay con PACU,UN RECORDU.
Bueno ey quea isu,pa que os Foristas opinen y que se vaya falandu de apróxima reunión a poer ser que sea en fechA QUE NOS REUNAMUS MAIS.
Un abrazu pa tos en especial a Brodas y comu sempris aupa a FALA.
Elsalto

Estimau Primu, amigu y Decanu de esti Foru: Ei nun había liiu esti mensaji tei, pero con anterioriai e escritu y me gustaria que a título "póstumu", se le otorgara o primer premiu a "Cancheira", te digu que o e escritu antis que supera tamen a tua opinión. Mais ayantri, avalaremus a Brodas, cumu Poeta. Pero debiriamus empezal por Cancheira.
Soidi a Fala.
Chalrrieira.

BRODAS megustan mutu osteis romancis si o primeiru era bo o segundu lea superarau ,comu a oitrus tantus nos as feitu recordar mutas coixas de cuandu eramus pequenus ei tamen me crii en o CHAFARIL ,¡SIGI ASI¡ un salu i soidi a fala

FINCACHA D´OIRU :Fai varius anus,veñu intentandu instituir en o lugal un premiu pariciu a o que he feitu en Sevilla y que tan boos resultaus pa convivencia y os diálogus me ha dau.O monumentu principal de esta Ciai a GIRALDA y un-a encina comu árbul pur excelencia de Extremaura,se yuntan,se enrean es as reidis y simbolizan os boos sintemuntus y relacios que entre toos debemus sempri tel.
Anualmenti se lo entregamus a un-a persoa o Institución que quel a Extremaura y o a demostrau con feitus.Son ya dedaseis y entre os premiaus destacu:A os emigrantis en o Pais Vascu,a Universiai de Extremaura,A Cristian-Lay,comu empresa en Jerez de los Caballeros,a o expresidenti RODRIGUEZ IBARRA,esti anu a o actual GUILLERMO F.VARA,a que foi Ministra da Vivienda Mª.ANTONIA TRUJILLO y....
Leu o Foru y cuandu teñu tempu y sobre too pa recordal a yenti que han siu boos y nos han desiau,vos mandu algu.Hoiyi veu un-a proposición de fel algu pariciu con os do foru y comu o veu ben,o apoyu,me sumu a que sea pa BRODAS,pero tamen aportu que sin sel furista tamen se le poi dal a otrus y que teñan mutivus.
Arriba vos poñu Fincacha d´oiru.Sempri he pensau en esi yugu participativu,animau y que necesitaba materiais tan entrañablis comu un pau afilau y un puñau de barru.Esa he miña propuesta,con esta idea cabin mutas mais,sempris que veñan cargas de boas intencios se debin de admitir.Noyotrus entregamus insignia en OIRU,en Plata y pa toos socius un-a de Alpaca.
Respetu a o CRONISTA CHITU e de idelbus que o ultimu actu que se organizó con a participación de dedaseis Hogaris Regionais foi muy grandi.Así o reflejan os principais periódicus y televisios locais.Cerca de tres mil persoas,poeran recoller información de distinta Regios,degustar productus y ver bailar a grupus comu o que treyemus de Fregenal de Extremaura y tamen o Grupu Galegu de Moaña(que he lugal hermanau con San Martín).Pur esti mutivu,tuvi a oportuniai de falal en mañegu y de idel dondi estamus.
Aproveitu pa choral y aportal lágrimas pur esis canus do chafaril que pur primeira ve en-a historia han desiau de eital agua.Cuantas coiyas se foran pa o mar con esas aguas.Brodas,que tantu bebei y chapoteo con elas,ha reculliu sintimentus,nos os ha ditu con gustu y nos ha feitu reflexionar si somus culpablis-Qué ben que haya mañegus así.O FORU os ha descubertu,Cuantus y cuantus talentus se han pirdiu.Cuantus mañegus poeran ser águilas y se queorin en pardais.Mutus se nos foran,pero hay otrus que están fendu dondi están,un-a labor calá y son muy,muy recuñucius en os sitius dondi están.Hay que dil a pur elis,destapalos,Merecin un recoñocimentu.He o millor HOMENAJI que le poemus fel a seis aguelus,pairis y a elis.

Doidi pa toos y un abrazu

Estimau amigu Fincacha41. Ei sigu esperandu que digas algu por D. Ciprianu, ya que tú o sustituistis mais de unha vé y te uibiu falaal de él. Ei e feitu un recordatoriu de o Santu de D. Ciprianu y cumu foi o primer Maestru y únicu que tuvi en o Lugal, aunque fora, cumu fora, teñu que recoñocel que algu aprendemus. ¿Que con otru hubera siu millol?. Nun o dudu, peru comu con esti hemus tiu recordus, boos y maus, recordaremus os boos que son os que nos fain vivil.
Soidi a Fala.
Chalrrieira.
PD. Fincacha41. Que te ví fai mutus anus en Melilla ¿Te acordas?

Por supostu que mei votu e pa Brodas, nun solu por esti anu, sinún por toa sua "obra". Istu hai que hilvanalo ben, pos aparti do títulu habrá feli un recordu comu didi Fincacha-41. Esti se puia encargal de fel un diseñu-modelu asi comu unhas pinks (¡¡que palabru¡¡) pa o foru.
Muñu: Vai preparandu o viñu.....que agua ya temus, por o menus pol aqui, leva chovendu unha semana. Me he comprau unha barquita, pos istu pareci Venecia..........sin tí.
Forti abrazu.