San Martín de Trevejo - Caceres

Estuvi vendu, con tô dolol de mei corazón, esi pilón secu, esis canus que na eitan, y me entró muta pena.
Nun críia ei que isu puera pasal, pero se ve que nun hai trucu, ni retoqui niñún en a fotografía (por otru láu magnífica). Gracias mye, por a información gráfica.
Se m´han ocurríu estas décimas:
B_RODAS


O PILÓN D´O CHAFARIL

Si un d´estis anus pasáus,
alguin te viñera a idil:
- ¡o pilón d´o Chafaril
está vadíu, s´ha secáu!;
quizás huberas pensáu :
- ¡Esti tipu é un ignoranti!
Sempris de forma constanti
boa agua de alí fluía;
y en a maioris siquías
quitó a sé d´os camiñantis.

Pero amigu: esti verán
- ¿has vistu o retratu, Nandu? -
o pilón se está secandu,
¿ondi os burrus beberán?.
Ni pa mollal un-ha man
cai agua de aquelis canus.
Ni siquera os máis ancianus
recordan tanta siquía;
hubu coisa paricía,
pero ia fai mutus anus.

A o vel o pilón asina,
m´entran ganas de choral.
As hortas d´o mei lugal
san pirdíu ¡maire qué ruina!
Mais os que tenin piscina
tenin agua en abundancia.
Nun aleguin ignorancia
as nosas autoriáis:
a ver alcardi: ¿qué fais
anti tamaña arrogancia?

¿Leva agua o ríu Cerdeira
o pozu Viga, o Adibral?.
¿Hay agua n´o manantial
d´a Trevexana ribeira?.
¿Cúmu está o Pozu Migreira?,
¿o Pozu Cura?, ¿o Cirilu?
¿Y o muñu de tíu Camilu?
¿Qué pasa pâ fonti o Práu?
Dimi algu bô d´O Encanáu
y me quearé máis tranquilu.

¿S´ha secáu a Fonti Tacón?,
¿sai agua d´a Fonti Nova?.
Habrá que esperar que chova
pâ que se encha o roiu Don.
Se me parti o corazón
cuandu voi por A Cachina,
por os Quintus o a Charrina,
y veu tan secu esi valli;
y os arroius por a calli
vadíus, en cualquel esquina.

B_RODAS

Como sempris, resulta unha delicia y muy relajanti lel os versus que , con tantu acertua ademaism escribis, cono os (I) esperaremus a segunda parti a vel por dondi vya acoisa, Soidi, Chitu.

Amigu Brodas: Comu sempris nos das un a aligria con esas rimas que pos,ya se ve que coñocis ben tos os pozos,y que eres un eruditu en o campu.Efectivamenti esti anu temus una gran siquia,tos os rios estan secus,o que feya falta e que se secaran tos os arbulis que tenin,pues asi estarian millor y al menus nunchuparian tanta agua,e depena ver tos os rius,bueno os rius nun se ven. Gracias por fernus pasar un b o ratu con esas poesias.
Aproveitu tamen pa idili a Cerrumiquili,que animi a o Muñu a comprar un as botillitas de esas que el sabi. que aqui estamus dispostus a fer o que faya falta,pa pasar un ratu yuntus y volver a escutar a Maruja, esas cancios que tantu nos gustorin.
Bueno un saludu pa tos y cumu sempris aupa a Fala-
Elsalto

Bravu parenti, cumu sempris genial.
Despois de vinti dias eno Lugal pasu a infolmalti da situación da agua.
O Pilón d'As Hortas queia agua cum regulariai, sempris frisquita i de boa caliai, esti manantial naci ali cerca i num se secó.
O Pilón d'O Forti num tinha problema polque e agua da ré pública.
¿ Que pasa cum O Pilón d'O Chafaril ?
Estamus d'acordu qu'hasiu um anu secu, esti manantial sai eno Encanau,
sai mui a fror de terra, desdi um principiu esta mal canalizau i pasandu pora finca dos buticarius esti agua se perdi, asi de sincilhu
i de lhanu, era mestel prufundizal eno manantial, despois fel um'a
cunducción ben feita i seguramenti se sulucionaria o problema.
O tema e o de sempris, quen vai a idel que faltaria agua, pos cumu
sempris hubu abondancia pâ que metelnus en obras i gastus tontus, tantu
vai o cantaru a fonti hasta que se rompi, ao final a mairi naturaleda
arregla tô, en cuantu chova sulución compreta.
Vos deisu polque me está entrandu sé, soidi pâ tôs.

Mui ben BRODAS por esis versus que con tantu acertu nos describis a dura realia, pero sempris e un-ha delicia leelos. Eris un maestru en a
materia.

A miña version e esta:
Ya cuandu chigui a primeirus d'Agostu, vi con gran triteda cumu "choraban" aquelis canus, i un-hos dias dispois
pasò o que tiña que pasal, "espirorin" i a o dia siguientia o pilon le paso o mismu. Tantu me afectò, que dispois ya evitaba pasal pur alì
pa nun vel aquel lamentabli espectàculu.

Que pasò? tanta a siu a siquia? Si en tò mes d'Agostu nunca faltò agua en o lugal, ni en as piscinas ni en os cespis, ni en o pilon d'as Hortas, ni
en a Fontinova. Porque o Chafaril?, Tendran algu que vel as novas caxas que se han feitu p'ali en o Encanau i cercanias?Nun o sé. Solu sé que
en toa a miña existencia nunca habia vistu asi o Chafaril.

Didin que nunca chovi a gustu de tòs, pero ei creu que agora si habria unanimiai, i si non habrà que volver a sacal o "santu" cumu se lo piran a aquel
cura... i a o que esti le contestò.. !!POR MI SI QUEREIS SACALO, SE SACA,PERO NUN ESTA O TEMPU DE AGUA!!.

Bueno ya vendran tempus milloris.

Mui boa esa descriccion de NACHITU sobri Salvaleon, merecera a pena visitalo.

Veu que ya esteis pensandu otra ves en enchel as "andolgas", (VANDA DE LAGUMÀS), contei cummigu hééé.



Soidi p'a t'os i pa fala, desde Paris cun un tempu variabli, 24° dispois de un par de dias de "grisaille"


M/E

Brodas felicitaciós!! por as rimas que as escritu, da gustu leélas mira man sirviu pa coñocel a o pozu? Cirilu, ni idea dondi está, ni siquera sabía que existia, y por o riu de tiu Camilu, supoñu que te refieris a mei pairi, ni gota que pasa por alí. Por dondi empeza a quel un churritu e por o canu do meiu do Chafaril. Y en cuantu a o tempu, ya veis agua pa tos os laus menus paquí, algunha pequena tormenta que pasa fendu un poicu de burla a tos os que nos pasamus o dia mirandu po ceu a ver si e verdais que cai, pero ná, inclusu en Valverdi a queidu unhos bos baticós fai unhos dias y pa quí na de na, así que siguiremus a espera y mirandu po ceu.

En a vindima da unha pena ver a cantiai de gallus de uvas secus por o sol, estában agosteitus por completu, sé que por mutas viñas isu a siu muy común.

Soidi pa tos y pa fala

mye

Que pena num poel mandal agua d'aqui pâ o Lugal, esti vernis en Bermeu
queran 120/l por m2 i hora i en Lekeitiu 150/l dambus son pueblus cum
portu de mar, peru en otrus lugaris ia quei tamén um'os 50-60 litrus.
Num hai duda que o micrucrima do nossu Val ha cambeau, reunimus toas as
cundicios pâ que chova, ben de arbolau, que istu sempris reten a humeai
cantiai de fontis i manantiais que risistin as siquias, peru estis se
tenin que cebal cuandu chovi, de cualquel folma tendis que vel o tempu
ena tilivisión purtuguesa pâ vel o que va a fel eno Lugal, estamus ena
mesma franxa que elis i o nossu Val ten um crima máis pariciu ao sei.
E curiosu que sin habel chuviu ia empeci a quel um poicu d'agua poro
cano do meilhu d'O Chafaril, dixi en otru escritu, que esti agua se
pirdia pora finca que cruzaba, me reservu o que quisera idel purque me
encendu, hai coissas que num han cambeau ni cambearan, algum'os tô o
querin pâ elis, a lei do embui.

Soidi pâ tôs.

Brodas,
!!!A forma y o fondu de estis versus..... simplimenti !!!Favulosus!!!!!
Esperu con impaciencia os segundus...

Nachitu,gracias por esa descripcion tua
Bo dumingu pa tos ,
desde Paris con nubis y boa temperatura
un abrazu
Anduriña

Estimau amigu Brodas:
Sintu que teñas que fel unha poesia de que hay sequía en o nosu Lugal, empezandu pol o Pilón de o Chafaril.
Sempris quendu os tres canus agua a mansalva, cuandu víñamus de yugal a o fútbol, en dondi son agora as Escuelas. Algunos se puñian debasiu de os canus pa bebel y poñersi en peligru de quersi pa o pilón, pero nun pasaba isu; eran dagais que feyan deporti pasandu debasiu de un cano pa chegal a o terceiru y logu volver pa trás.
Cuanta agua hemus bibiu en esis Canus y ademais tiñan un suiu especial ca un de elis y os tres yuntus
Nun funciona estis dias a Cámara, pero cuandu funcionaba en o mes de agostu, observaba que o campu estaba muy secu; as herbas, secas y os árbulis mirandu as follas pa o ceu, a ver si queya agua pa lavarsi éstas y regarsi toos os campus.
De toas as formas Brodas, gracias pol as rimas, que me gustan mutu y están ben feitas. Sigui, cuandu poyas deleitandu de estis pequenus godus.
Soidi a Fala.
Chalrrieira.