San Martín de Trevejo - Caceres

Algén a ditu q'eno Paleolíticu s'asentorin os primeirus moraoris eno
nossu lugal, istu e dil mui lonxi, pos e um periodu tan atrás que num
temus probas sobri isu, si temus probas do final do Neolíticu, a estela
que falhó Nista eno 1982, ena finca da Casa da Manta en'Os Ferreieus, serra Cachaza chamá tamen, data de 2500 anus a.c.
E idel, da época dos Vettos, estis eran ganeirus, agrestis e indómitus,
moraban en tribus o clans entri arroius i valis, moraban en chafurdós i s'alimetaban de pan, carni i leiti fundamentalmenti, cundo les feia farta algu distintu utilizaban o truequi cum os Tartesius, esti moraban eno que hoixi e Purtugal.
Entri os arroius que baixan de Xiálima i da cumbri do Adebu hubu um
asentamentu, e idel um castru, purqui citania era cuandu esti tinha
fortificacion cunstruia i moraban mutu tempu siguiu, hoixi nus quea o nomi solu, Toiru Pelau, esi tesu qu'os romanus chamorin Altarium populatun, tesu poblau, dexenerandu a Toitu Pelau, enesi tesu moraban i seis ganaus pastaban pur o val Dumingu i a Rucinega.
Inda nus quean nomis d'entoncis, cumu Arravisis, Arrecachaus, Arrasaius
i Arraconis, estis últimus moraban eno val do Arragu, tamen nus quean os
chafurdós do sei tempu, máis tardi aproveitaus pur os celtas.
Inhumaban seis mortus colocanduos sobri túmulus, máis tardi us icinerorin, peru nunca os enterrorin, asique a estela num poi sel lápida
funeraria ni nâ pariciu, peru d'istu falare enotru momentu, ten sua
historia particulal nâ de desprecial.

Nota:

Os datus aqui mentaus, estan sacaus d'escritus de Mingu, Dumingu Duminé,
Jose Luis Martin Galindu, Flurintinu Parra i da biblioteca virtual extremenha, queru agradecel a estas persoas tô qu'an feitu pur ricopilal a nossa historia.

Soidi a tôs i larga via a Fala.