San Martín de Trevejo - Caceres

Do lugal,cruzando a plaza
dívamus os artilleirus
cuatru amigus,compañeirus,
preparaus pa dil de caza,
dos cuatru,dois era Vieiras,
que era José y sei hermanu,
un campaneiru,Emilianu
y ei con a compañeira,
que era a gana de cazal,
a ilusión por o deporti
y to aquilu que reporti
un bo día de camiñal,
Os Vieiras hasta vian
as lebris estandu eitás
cumu se didi "encamás",
o mais claritu,durmías,
peru solu le tiraban,
cuandu as cuiteitas,currían
y nunca cuandu durmían
pos antis as despertaban,
tiñan muta puntiría,
y lebri que seya solta
prontu queya dandu voltas
en o estertor da agunía,
Y era aquel ritu dos cuellus
algu cumu pa contalo
por a forma de matalos
de esa parella de vellus,
y elis pa mi me deixaban
cuellus que divan andandu,
tranquilitus,camiñandu,
y extrañeitus me miraban,
y ei,que les feya cassu
os dois cuillitus que ví
a dambus dois os matí
cuandu divan pasu a pasu,
Era que o bo de Emilianu
era tan bo compañeiru
cumu bo de campaneiru
y feya anu tras anu
de batiol con os perrus
y hay que vel que ben batía
con aquela algarabía
en os llanus y en os cerrus.
Nun miris pa os aviós
recordu ei que me idía
y prepara a artilleria
que os cuellus didin adios,
De aquelis grandis momentus
guardu un montón de retratus,
historia de grandis ratus
recordus y sentimentus.