San Martín de Trevejo - Caceres

A calli Placentines de Sevilla, fai costa, como a de San Peiru en o lugal, cuandu acaba, tirandu pa isquerda, está a Calli Francos, como si fóramus pa plaza, pero esta e unha calli peatonal, larga, estreita y chea de tendas antiguas, e o Cascu Antigu mais puru y por dondi pasan a mayuria das cofradías.

Oixi estaba en esa esquina precisamenti y contu o que vi, por que o que sintí nun se poi.

Subia o pasu de Cristu, en una chicotá, o sea de tirón, marcandu os costaleirus o pasu a o son de unhas finas cornetas que estaban arroipas por un gran grupu de tamboris que feyan retumbal os uivius. A Giralda, a cincuenta metrus a isquerda, a iluminaba inda un palidu sol do atardecer que pareicia que se resitía a abandonal Sevilla.
O cristu se paró o final da costa y poicu a poicu foi girandu sobre sí mismo dandu a volta, sin perdel o compas da musica, pa entral en a Calli Francus; cuando acabo de fel o giru, soa unha salva de aplausus y si mirabas o Cristu de frenti, un Cristu agonizanti, como pindu agua, se via a giralda de fondu da mitai parriba, destacándusi o minareti cristianu y o giraldillu; asi quitu o pasu, desde un balcón que estaba frenti a mi, un homi, ya de edai, empezó a entonal unha saeta, parándu a musica. Cuando acabó, otra explosión de palmas y o Cristu arrancó pa perdersi por a Calli Francus. Era o Cristu de la Sed, Belen. Oixi si.

Dispois de un bo rratu esperandu, palá abaisu, se ve entre o fumu dos incensarius que anuncian a chegá da Virgin, o paliu con un montó de velas.
O Paliu, con techu bordau de oiru y barais de plata, subi, como bailandu,a o compás de una bonita melodía tocá por unha enormi banda de música impoñenduli o ritmu dos costaleirus, que un esforzu, mais que humanu, sin paral, en otra chicotá, nun solu subin a costa enteira sinon que, lentamenti y mecendu o pasu, van girandu ma tomal a Calli Francus; a Giralda, ya nun a baña o sol peri sigui alí vigilandu.En esi momentu do giru, desde o balcón donde antis cantorin a saeta, empezan a quel centus, que digu, milis de pétalus de rosa, que unhas dagalas le tiran a Virgen de Consolación que entraba a aquella calli, hasta que se paró. Ensiguia, otra saeta soa, esta ve, entoná por unha mullel, ya nun jovin, que fidu calal nun solu as palmas que soaban inda, sinon a to mundu.
Cuandu acabó, un gran ¡ olé! soa con mais palmas, se oivi a vo do capatá idel ¡ Al cielo con ella mi arma ¡, le dan un tiró parriba a o paliu que pareci que via a ser dispiu y sigui, otra ve, con ritmu de otra peza de música, pa escondersi en a Calli Francus............Apaga y vámula. Vos salua Chitu

Boas noitis chitu.
Me alegra habel liiu esta crónica, pues oixi por cuestios laborais nun he puiu dil a vel ninhuna cofradía y con istu a he viviu un puiquitu.

Ayel tuvi un fallu técnicu, efectivamente era San Benito que diba a recollersi, y un poicu mais tardi tamen escuti os tamboris de San Esteban que entraba en o templu.

La Sed ha seidu oixi, efectivamenti, y ei a he sufriu cuandu diba a traballal esta tardi; he tardau en chegal 50 minutus en un trayectu que habitualmenti o fallu en 15 ó 20(¡CÓMO ESTABA LUIS MONTOTO!) tamen ten istu a Semana Santa sevillana, se disfruta y se sufri a o mismu tempu.

Mañan diré a disfrutal de toa unha mairugá, a seida e laboral, pero a disfrutaremus a topi, pues nos levan a un palcu en plena catedral, de 12 da noiti a 10 da mañan, esperu que cuandu a prensa (que van a dil a grabar y a entrevistal a os que ei acompañaré...) se acerqui, nun me vean dandu cabezazus de soñu
Un saluu y a durmil.