Boquerizu - Asturias

Casarase Xuaquín de la Maruxa
con Lola, la Mañosa,
rapaza que, diciénlo pe´l pueblu
yera lo más priciosa.

Tinia un pelu roxu, mu rizosu,
comu´l plumón d´un ave;
güeyos negros, cargaos d´unes pestañes
llarguísimes y suaves.

La cara, igual qu´una muñeca,
entre roxa y trigueña;
les caeres, reondes y macices,
mas dures qu´una peña.
¡Que seríen de dures y de firmes,
que Xuacu quedó bizcu
un día que n´a fonti, per sorpresa,
quiso dai un pillizcu...!

D´espetera.... En forma y desarrollu
yera tal menumentu
que, cunten, que la Loren invidiabai
tan flamante portentu.
En fin...una rapaza...¡de bandera...!

D´aspeutu...¡com´un trén...!
Una xata (dicíalo el mió Xuacu)
como poques se ven...


N´el cuartu que tomaren en´a fonda
punxerons´acostase
y entós queose el probe Xuacu apastoriau,
al vela esnuase.

Quitose lo primero, una peluca;
dexola n´una silla
y enseñó una cabeza renegría
igual qu´una escobilla.

Fizo luego n´os güeyos
unes coses extrañes
y quearon enrriba la mesilla
les seoses pestañes.
Alluego, les caeres reondiaes
golvierons´anguloses,
pos yeren.... d´isi plásticu italianu
aparti d´otres coses...


Y diz el probe Xuacu, asustau,
con cara d´estrañeza;
los güeyos mú abiertos... ¡como platos...!
les manes n´a cabeza:

- ¡Ah, Lola...! Paez que me barrunto,
que tás prefabricada...
Creyía, que tinies munches coses
y...tuyo... ¡non ye nada...!
¿Qué tienes natural...? ¡Déxesme fríu...!

- Pos ... mira ... ¿Natural...?
¡Na más qu´un fíu...!




FRANCISCO SARANDESES