DIÁLOGU Nel Campu de San Francisco oyí falar á dos vieyus la compresación siguiente, un sentaín y utru tiesu: - <<Sabes, Xuanín, que te topo como atollondrau de afechu; de saló ¿cómo te alcuentres? - Muy mal, Colasín, me alcuentro; toi de la vid´al cayer, sin d´esperanza un reflexu, y, por si caigo o non caigo, voy dispidime del pueblu onde mió Bárbola y yo mos dimos el primer besu. - To tristeza y tos dolencies m´endican que tás enfermu, peru que te vas del mundu eso, Xuanín, non lo creyo. ¡Morrer tú?... Ha haber abondo pa que Xuanín ciarr´el güeyu sin ver d´isti añu les fiestes que se cellebren n´Uvieu, d´Antroxu les bullicioses galanes de Samateu. Déxate de boberíes, olvida to pensamientu y agarraín al mió brazu vamos a dar un paseu. - Per muncho que me platiques de aquí, Colás, non me ménio. - Cúntame lo que te duel. - El rematismu, los niervos xunto con otres llaceríes que non caben e´nun cestu. - Esa enfermedá se cura con esfriegues más o menos. - Sí, peru ¿quin me les da? - ¿Quin va dáteles? Yo mesmu. - Tienes manes de degorrio y, la verdá, que tarrezco les pongas (sin que t´enfades) enriba del mió pelleyu; de una sola terellá echasti á Bastián al suelu y, Colasín, sin arródios, yeres muy brutu pa méricu. Pa esfriegues la mió defunta (¡lloro cavez que me acuerdu!) con sos manines bendites y pallabres de consuelu quitábame los dolores resfriegándome to el cuerpu, y de mi non se apartaba hasta dexame durmiendu. - ¡Barbolina foi un anxel! ¡llástima que se háiga muertu! ¿Yera guapina de cara? - La más Llinda del conceyu; toa la xente, rica y probe, fixaba nella los güeyos. - Y tú, Xuán, ¿non te anoxabes? - Non, home, non; ¡Dios eternu! si goliés que m´anoxaba m´unviabe mil llegües lexos. Sobr´isi puntu, la probe non yer´amiga de enreos. - Hay, Xuan, cuartos de hora malos... ¡quin sabe si en unu de ellos!... - ¡Desllenguáu! ¡Caluniaor! si t´alcanciás mió cibiellu xuro que te desllombaba, sin dexate san´un güesu. ¡Non te llevaren los diaños per ruín, villanu y preversu! ¿Y risti? - ¿Non voy reyime al vete, Xuanín, derechu, los güeyos arremellandu y lixerín como un neñu? Toquete un puntu doliosu, llastimete col intentu de curat´el rematismu y al fin y al cabo curelu. Perdóneme to muyer que mos mira dend´el cielu; y tú, Lín, dí lo que quieras. - Si foi ansina ¿alto el fuéu! - Pos agora que tas bonu ¿de qué diaños falaremos? Tú ya estás apañaín sin salú, probín y vieyu. ¿Sabes los años que cuntes? ¿Acuérdeste? - Sí per ciertu, pos son tantos como rales cunten tres duros y mediu. - Mialma ya tienes motivu pa dir mirando pal suelu y escoyer sitiu, si quiés, onde s´entarren los muertos. Si muerres antes que yo y crucies per el infiernu dí á los degorrios ¡que bailen! ó que se toquen el piescu.>> Y cada un col so palu los dos vieyinos se fuenon á beber un poco sidra en el llagar de Celesto. PERFECTO FERNÁNDEZ USATORRE
|