ADIOS MARCIAL Te has diu con a mision cumplia,desiandu en osteis os milloris GES y dos que nos seguiremus aproveitandu.Eras comu un pairi de toos .Nos dabas consellus,nos contabas coiyas.Eras un-a Biblioteca que guardabas os milloris títulus de homis mulleris e historias do lugal. Tuas pichorras,abertas pa toos,foran sempri,cátedra de elegancia,serviciu y boos moalis.Alí ademais de bebel y comel,se aprindia humaniai.Sempri que me vias idias...si tes algún cumprumisu,mo didis.O últimu foy esti verán y comu sempri "CHAPOO".Os teis nunca te van a ulvial,pero tees que sabel que toos os mañegus te quirían,choran a tua morti y sintin que puntais comu tu,nos teñan que desial. Fostis pairi y muy boo homi pa Silvestra.Ferraol en o potru do camiñu bellu y o millol VETERINARIU sin titulu oficial en a Zona. Calzabas cabalus,facas,burras y cuandu mutus sabius ya num puian cural as matauras,ni sacal o biderru da barriga,dibas tu y a os poicus días os animais seyan correndu-Tiñas talentu,intuición,sonrisa y humaniai y con toas esas cualiais,nunca presumias ,ni especulabas. ¡Qué boa persoa fostis!Homis comu tu merecin perpetua memoria.Me sumu a Chenchu y piu un potru pa ti,cerca do lugal dondi o tiñas.Os que estamus y otrus que veñan,le contaremus a os nosus fillus y netus pa que sirvia y quin foy o millol FERRAOL. Tinín,Luisa ,Marcial,Jesús,Silvestra...Ya nun fai falta que le digais que num sembri en a horta ,ni que se vaya a paseal solu.A similla que a desiau a vamus a cuidal entre toos y os que paseamus,procuraremus telo sempri o lau.Era un boo amigu que tuvu un-a dispia extraordinaria.Ei desde Sevilla,tamén vi a mutus animais agradicius en o enterru...quizás era o principiu de un CONTU que pa siguil soñandu en esti mundu debemus cuntinual. ADIOS MARCIAL |