San Martín de Trevejo - Caceres

Estuvi o dumingu en o lugal. Alí ví y estuvi falandu con algún furista.
Me dí un-ha volta por algún sitiu de interés y pensaba que de aquí a un-hos anus pueran sucedel coisas cumu éstas:

ROMANCE AÑO 2020

Dois manhegus, ya maioris
por O Chafaril camiñan;
recordan tempus pasáus
recordan coiças dá vía.

Son maioris, nun son velhus
inda le quean energías,
falan d’agora y de antis
qu’hay coiças que nun se ulvían.

- ¡Lucas! nun to vas a creel
o que me pasó otru día,
que diba p’a Carta Velha
y cuandu chiguí alí arriba

me trupicí con tres homis,
con saias largas y finas,
con a cabeza pelá
redandu un-has letanías

Pinsí que foran obreirus
d’os que venin a vindima,
pues pareci que inda quean
p’alí abaxu algun-has vinhas

Y nun é lográu sabel
a qué uficiu se dedican;
nun leva picus ni azás
ni forman un-ha cuairilla.

-Ei pinsí, ¡amigu Fradiscu!
qu’esas coiças as sabías.
Esis homis d’os que falas
son un-hos frailis budistas

que, agó está vivindu en chozas
pero fairán insiguía,
un conventu p’a vivil
por encima d’a Sirrita.

- Y tú ¿nun has vistu o hotel
que hay p’alí p’a Crú y a ermita?
- Me contaba mei agüelu
que p’alí un conventu había

ondi hubu “claretianus”
y en denantis “jesuitas”;
dondi estudiaban dagáis
y agó vivin os turistas.

-¿Y qué me didis d’os muñus,
qu’an postu alí, n’a Cachina?
Que se ponin a dal voltas
en cuantis salta un-ha brisa.

¡Hay que vel o ruíu que metin
cuandu se movin y giran.
¡Que ya s’han díu as mixengas
y as melruas, y as andurinhas!.

que apenas se ven lagartus,
garzañotis, lagartixas
qu’esis pobris animáis
s’an escapáu p’a Castilla.

- Y p’a dil p'a Ciái o a Paiu
hay agora un-ha autopista.
A carreteira era antis
estreita pero máis linda.

- Se poirá eidel que é progresu,
se chamará melluría,
Nos enganan cumu a chinus,
nos contan mutas mintiras.

- Bueno Fradiscu, tú pensa
que por lo menus quea inda
o viñitu d’a pichorra
y en o bar un-ha partía.

Porque isu ha cambiáu poicu,
ya que o “cuatru bastus” inda
cuandu a o dápiti ýugamus
é un-ha carta de valía.

Y otru día con máis tempu
pasaremus a “revista”
a tóo que se vai perdendu
y salvalo cunvindría.

Con os milhoris deseus de que nun sea así.

BOOS DÍAS.
Soidi a o mañegu y a toos.

B.RODAS