San Martín de Trevejo - Caceres

O SOÑU QUE TUVI

Nun sabis que tuvi ayel ,
mentras estaba n’a sesta
un soñu con muta xenti
que nun queru que se perda.

Mutu jaleu n’o lugal,
a xenti veña que veña,
segundu sabau d’agostu:
sólu son as dodi y meia.

Un-hos venin por aquí,
otrus por a calli aquela,
en vé de sel San Martín,
pareci sel un-ha feria.

Por o ponti O’ Chafaril
venin dois con marcha lenta,
muy contentus se les ve,
y nun parecin tel presa.

En a porta Don Marianu
agarran por a dereita,
subin a Guardia Civil
y hasta a calli San Xuan chegan.

Tamén venin duas mulleris,
conversandu muy contentas.
Por a calli A Palla arriba,
os seis homis as esperan.

Tiran p’a calli San Xuán
mentras animáus conversan
y se xuntan con dois máis
que d’a calli O Meiu chegan.

Disumulandu y silbandu,
aquelis tres ya se acercan,
hasta dondi antis estaba,
a taberna d’O Vieira.

Por a costa de San Peiru,
hasta a misma praza chegan,
dois que miran o reló,
y se encamiñan a Igrexia.

Máis nun entran a redal
porque tiran p’a prazeta,
y por a calli d’O Portu
hacia a calli A Ciai se orientan.




Otrus venin por O Forti,
¡vamus a siguili a senda!
y continúan hacia arriba,
pasan o Llanu d’a Igresia,

siguindu p’a Calli O Portu
hasta a calli A Ciai pasean.
Alí se me perdi a pista,
os vidiñus me dispertan.

Nun me pareci que vayan,
a traballar uliveiras
caxi toos están remuáus,
y nun levan ferramentas.

Nun creu que levin camiñu
d'apagal fogu p’a serra;
as campanas a rebatu,
pareci que nun tañeran.

A calli Ciai chegan tóos,
por camiñus y calexas,
máis ya nun sé qué pasó,
pois me dispirtí d’a sesta.

Me hubera gustau sabel,
o que fidu a xenti aquel-a,
tal vé m’o queira contal
un cualquera que istu lea.


B.RODAS


Así ha síu, me gustaría habel sabíu qué paso.

BOAS TARDIS

y los sueños, sueños son
que diría o clásicu. Creu que ha siu máis modestu pero máis entrañabli. Estábamus unhos cuantus en a boiga de tiu Luis. Os anfitriós se ha portau muy ben, muy ben , muy ben, y isto e idel poicu: había bo viñu y boa cumía pa tos en un dos milloris sitius do lugal dondi se poi charreal (os ferreirus se han portau, Superferreira incluía), cumu si fora un foru cumu pensaban os romanus, tos falandu con tos y recoñocéndunus por o pseudónimu y por o nomi real. Alí estábamus caiýi tos; faltaba CANCHEIRA, pero estaban as suas puisías dedicás a o lugal y as persoas do lugal; Castora a líu a que dedicó a tíu Luis que se puía vel en unha fotu en as CANCHEIRAS: unha boa metáfora p'a o que estaba pasandu alí. Algún otru ha faltáu, pero con os mensajis dos móvilis caiýi ha estau presenti. Se ha recordau a CANCHEIRA guardandu unhos segundus de silenciu. He vistu a persoas que nun había vistu desde fai mutus anus y me he alegrau que otras se hayan alegrau cuandu me han vistu y me han recuñucíu: ísu e a vía. Ojalá que nos volvaus a vel otrus anus, que o lugal, San Martín (nun Sa Martín cumu se empeñan algunhos en chamalo, tamçen o cartel que hay a entrá do lugal -naidi didi Sa Peiru, ¿a que non?-), esi lugal que nos uni a tos siga sendu un bo puntu de referencia en as nosas vías. Otru día me gustaría idel otras coisas, que diré.
Me dispíu con un salú que se está cunvirtindu en clásicu en o foru: SOIDI PA TOS.
O CAMIÑU