Boquerizu - Asturias

Roñé con Pepé'l Corio
Po'l asunto d'una cárcoba,
Y tiró' una isprisión
Que yé la que más me cala.
Entós yó, sin mas ni menos,
Peguéi una mormiellada,
Estrozando-i el dentame
Al só cochino y canaya.
Que me llamen sinverguenza,
Pelgar,desprudente,Guaxa,
Borracho, mocero,burro,
Manguan,fio d'una cabra,
Tramposo,lambión, xudio,
Rancoyu,musguin,lilaina,
Combayón,maguetu, misere,
Gocho, vaqueiro d'alzada,
Pioyón, tiñoso, embustero,
Entruso, malvís, pantasma,
Gafez,payoto, fatón...
Non se me dá una corbata.
Manque me llamen maricu
Non arrespondo palabra;
Si dicen que tengo roña,
O que toy enllén de caspia
Y soy enxencle y falseru
Cuido que naide me falta;
Y aguanto com'un santin
Que digan que tengo sarna.
Premito que m'arrabuñen
Y que m'apiedren la casa
Y me cuspan nel focicu,
Y m'arroben la manzana,
Y que me pongan la torga,
Y que me mexen'na cama,
Y abracen a la muyer
( Non siendo mas qu'abrazala ),
Peru lo que non consiento,
Asina me coma l'alma
Yé la isprisión que'l Corio
Tubo a bien de chame'n cara;
Pos de cuantas isprisiones
S'agomiten, la mas mala
Yé...peru val mas callar,
Porqu'el fiégadu me baila.
¡ Por vida'San Xuan Ladiao
Y de toda la mio castra!
¡ Vamos que dicim'a mi
Que non tenia crianza!