Boquerizu - Asturias

Consumidu per los años
morríase aquel vieyín
que yera el güelín de toos
los neños del Llugarín.

En´aquechos güeyos claros
rechumbrantes per so mal
perdiense les chumeres
d´una vida que se va.

E´nos cristales mugrientos
atopez, ya l´alborada,
atristayase´l candil
en´habitación fumiada.

En´l güertu de la casa
chucuría un paxarín,
muxe´na cuadra una vaca,
chadra un perru´n el camín,
canta´l gachón mañaniru
so agudu quiquiriquí
y, muy lloñe ruxel ruiu
de la ranga del molín.

Sospira´l vientu´l pasar
riscandu per la enramada
y so la yerba rachuman
les gotes de la roxada...
¡Entantu´l par de la cama
onde se muerre´l güelín
sospira abluyau y chorosu
aquel probe rapacín!
Y con acentu doliosu
sochivieu par la pena,
al vieyín que se morría
falabai d´esta manera:

- ¡Ay güelín de mios quereres
que solín me vas dexar
en sin taner n´isti mundu
quien me puea consolar...!
Nun tengo padre nin madre,
nin tengo casa nin llar,
nin otru cariñu tengo
qu´el que agora se me va...
¿Ay güelín del alma mía
que prontu de mí te vas...!

Y cuandu yo quede solu,
tan solu como´l raitán
que xime de rama en rama
sin achegar a topar
un nial en que achucase
y´un consuelu pa so mal
¿a onde diré yo, güelu,
a onde diré a parar...?

Cuandu quede ya tan solu
en´l mundu esti rapaz
¿quién me dirá aquechos cuentos
que tu me sabies cuntar?
¿Quién me chevará a los praos
per´el veranu a segar
y, dimpués, en los forcaos,
me traer´hasta´payar?
¿Con quién to dir yo a la Mata
a por ñeros de raitán
y quién me fará xiblaes
de corteya de figar?
¿Quién me algamará cereces
y nisos na pumará
y me dará scudiechaes
de lleche recién catá?
Y cuandu per la seronda
sea´l timpu d´esfoyar
¿quién me dirá comu s´aten
los viluertos p´enristrar...?
¡Ay güelín del alma mía
que tristi me vas dexar
en sin qu´haiga quien m´ensiñe
les canciones del llugar...!
¡Eses tonaes que sabes
cuayaes de sentimientu
con les que m´adormecies
per la nuiche al par del fueu...!

Calla´l probe nietecín
sospirandu sin cesar
y el güelín, cual si calara
la murria d´aquel rapaz,
llevantóse y falagolu
queriéndolu consolar:

- ¡Ay nietín... yo soy muy vieyu,
tan vieyu que nun lu hay más
y sientu que voy colandu
camín de la eternidad...!
Nun faigas mas pucherinos,
pon la carina melguera
que Dios que t´llá n´el cielu
aunque apierta nunca afuega...
Esmuce les llagrimines,
nun t´esmese la malena
y fai cunta qu´en el mundu
non hay más que llantu y pena...
Déxame que´nte míos brazos
te diga´l últimu adiós
y te d´el últimu besu,
nietecín del corazón.
Y agora que tamos solos
traime la gaita p´acá,
pos quieru morrer tocandu
la última asturianá:
¡Una de aquelles que viven
vibrandu per les montañes
y que sos notes devines
lleguen al fondu del alma...!

Y tú, mió nietín queridu,
encantu de mió vieyez
vas cantáme, pos aún quieru
oyéte antes de morrer...

Y dimpués qu´el alma mía
haiga fuxíu del cuerpu,
con tos manines melgueres
ciárrame bien estos güeyos,
pos quieru llevar pa siempre
bien guardaos dientro d´ellos
los paisajes emponentes
d´est´Asturias que yo quiero.

¡Tápame bien los oyíos
pa que n´ellos siempre vivan
les notes melancolioses
del cantu de mió tierrina!

Has cuidar bien del ganao
y nun viendas la Cordera,
pos ye la vaca más bona
que pastia pe la praera;
diéramos bones naciones
y muncha lleche mos diera,
y n´ella tenía´l cariño
la bendita de to güela...
Ten bon cuidau del perru,
que pa faete compaña
non hay meyor compañeru.
Y pa enterrame a mí
nun gastes munchu dineru:
Échame les gregorianes
rezaes por Don Ceferu
y qu´entre cuatru me lleven
gorín, guiri al cimenteriu...

Sentóse´l güelín na cama
y, con cariñu en sin par,
metú sol brezu la gaita
y´alcomenzóla a tocar.
N´el silenciu d´aquel cuertu
lloraben tristes tonaes
que gorgorita´l punteru
en notes seles y alaes.
Com´un ensame d´abeyes
mosconiaba el roncón
llenandu de vibraciones
to´aquella habitación...

Trasfigureu el vieyín
nun dexaba de tocar
nin d´acariciar la gaita
con cariñu sengular.
Alzab´al cielu los güeyos
cual si quisiés algamar
la toná qu´iba fuxendu
de so gaita´n sin cesar...

De prontu aquel nietín
con voz suave y melguerina
xuxurró les dulce quexes
de la probe <<Paxarina>>...
Y el güelín, cual si suañara
con la vida que i fuxía
zarramicaba los güeyos
al empar de la canturria,
y adormecíu, extasieu
talmente taba´l güelín
escuchandu la tonada
del pequeñu nietecín...

Un sospiru prolongueu
extremecioi tou´l cuerpu.
Dió´n alariu la gaita
¡el alaríu postreru!
Dexó´l nietín de cantar
y tou queó muy tristi
sumerxio n´el silenciu.

Co la cabeza n´almuá
y arreguilaos los güeyos
y abraciau a la gaita
chucóse p´atrás el güelu,
mientres diba sospirandu
con muy apagau acentu:

- ¡Sigue cantandu...nietín!
¡Sigue cantando a to güelu...!
¡Que quieru oyete...otro...poco...!
¡Que quieru oyete...morriendo...!
¡Que...ansí...canté...yo...de neñu...!
¡Que...ansí canté...yo...de...mozu...!
¡Y...ansí...canté...yo...de...vieyu...!

Llucía´l sol na campera
con resplandores de fueu,
canta´nel güertu un raitán,
lladra na caleya´n perru.
Oyense lloñes rumores
d´esquiles y de cencerros
confundíos con el cantu
de pasteres y vaqueros.
Canten grillos y cigarres
abre la flor so corola
y´entre´l ramaxe´l xabú
espandie cálidu aroma.
La ñatura con sos gales
llevanta´l himnu trunfal
¡En tantu, n´aquella casa,
dexa´n vieyín de alendar!

Vienen corriendo los neños
que hay en el Llugarín
a ver, comu to los díes,
al cariñosu vieyín,
y, al llegar adientro atopen
al probe güelín ya muertu
y con la gaita cruciada
per enriba del so pechu...

Arrodiense llorosos
los neños d´aquel llugar
y cruciandu les manines
alcomienzan a rezar:

-¡Padrenuestro!-dicen toos-,
por el alma del agüelu
que ta con los anxelinos
tocandu la gaita en cielu!

Y en silenciu, acongoxaos
van saliendu de la casa
rellimpiándose les llágrimes
que s´esmucen per sos caras...

¡Peru...xunt´aquella cama
ande ta muertu´l güelín...
sospira, triste y llorosu
el pequeñu nietecín...!



DANIEL G-NUEVO ZARRACINA

Pola de Lena 1899