Boquerizu - Asturias

Cómo alegra´l golver al pueblu hermosu
Onde, cuando inocente, unu xugaba,
Neros pillando aquí, frutas allendi,
Truchas pescando´n riu cristalinu
Que dexa ver el griju de la madre,
Y anda aquí jolgazán, allá entaína;
Tan prestu lleva piedras, retoriando
Como las jueyas que el oral esmena,
O ya remansa xunt´á dures peñes.
Dempués se´sgarma, en saltu caprichosu,
Jaciendo en jondos pozos blanca espuma,
Cerquinos que s´enanchan perezosos,
Jolinas, gorgolitos y jirvores.

Más alluendi en pimplón corre lixeru
Y dando un calumbón se precipita,
Diendo dempués per baxu verdes toldes,
Bañando las veguinas de olorosa
Manzanilla, poleu, verbena, xunclos,
Y otra porción d´herbatos diferentes.

Recollendo de juentes y de riegas
El preciosu caudal, jállase lluego
Co´las presas de praos y molinos
Que á la juercia lu tuercen pa los calces;
Y elli rabiáu y de coraxe llenu,
Ruxendu altivu, per sobr´ellas brinca,
Bordando rica tela nacarada;
Jastas´á que cansau de las regüeltas
S´esmucia al cabu pe´las cuevas jondas
Ó per ente las piedras y cascayu,
Y súmese´n´a mar siempre sedienta.

Vense sin fin de truchas, pintas, roxas,
Qu´el blancu pechu ensiñan cuando saltan,
Enredando y buscando aire y mosquitos,
Y dan de llombu sobre ´l agua amiga.

Cuando á l´oriella están en secu casi,
Quietas, tomando el sol, y ven á algunu
Prienden a´scape al conocíu asilu
De piedras, cuevas ó raizada espesa,
Más aprisa que flechas disparadas.

El hombre al velas en rapaz se torna,
Remángase hasta´l codu y la rodilla
Y entra á pescar así; cumple´l antoxu,
Sin reparar en que la edá y el xuiciu
Á llabores más graves lu destinan.

Arma el butrón; con llávanas menudas
Al par llevanta la jorcada presa;
Trabaya co´´l xurgón y la palanca,
Y al fragor de los recios xurgonazos
Y al truqiar de las piedras que regüelve,
Tal miedu las probinas truchas cobran,
Que van llocas y ciegas á metese
En´a´lcárcel de brimbias, n´á traidora
Nasa que á so elementu las arrinca,
Jaciéndoios convulsas retorcese.

O´ya, baxu las piedras, á la mano
Que lluego las estruya y aprisiona,
Consienten que las pula y las jalague,
Como mansas y dóciles corderas.

Tamién á l´oriellina en pedregales
Viven muy descuidadas las anguilas,
Y aunque´spulen´ n´a mano pescadora,
Con tiseras dentadas se sujetan,
Y en vanu ellas se enroscan y retuercen,
Puxando por burllar tan fiera maña.

Más tou no e divirsión, pes casi siempre
Pillase moyadura soberana,
Xustificando´l dichu de que
Á ensuchas bragas xamás pescárense las truchas.



AMABLE GONZALEZ AVÍN