Boquerizu - Asturias

¿Que non hebies quien te cante
Dicis, querida montera?
¡El diañu! fixe tonaes,
Y xuro de bona mena,
Pa´scaeceme de tí,
Enfotu de la mió tierra.

Qu´apenes hebes historia
Ruxen quien non saben della;
De ti, montera picona;
Del astur rica presea,
Por non ñacer ena villa
Emperifollada y güeca;
Pos yes del valle floríu
Que´l sol santigua y allegra,
Onde blinquen les nuvielles
Y el paxarín gorgoletia,
Del monti per onde gufa
La ñortada y qu´encapiellan
Les ñeves; y yes altiva,
Álzeste irguida y soberbia
Como el pino de les llombes,
Y como robredu recia.

Que lo diga <<El Carbayón>>
Cuando les rodíes en tierra,
Los brazos puestos en cruz,
Diba pagate láfrienta
La gandaya, sinón viés
Llegar la Devina Prenda,
Dende les manos dÁhumada
Pidiendo al home clemencia.

¡Benditu quién la mostrara,
Dichosos los que la uyeran!
Entós baxaste rendía
Al suelu´n acatamienta;
Marmullaben les muyeres
<<Benditu y alabao>> sea,
Desfixérense los ñudos,
Y algamasti gloria eterna.

Cómo allegra les quintanes
La mocedá que te lleva
Pa enquillotrar les mozuques,
Que fanse, mialma, mantega
Cuando so l´horrio faluquen
Cosiquines de querencia;
Y fexéndose les bobes
Garren el palu y enriendan
Al par qu´illos xugazaren
Col ferrete la cotiella.

Citáivos pal día´l Patronu;
Y hay que ver na carbayera
Picos de cien mil monteres
Ximielgándose na rueda
Col atadoñu na mano
Llevá´l pasu con fachenda;
Y antes qu´el diañu la´nriede,
El dir a buscar la neña
Pa entamar un xiringüelu,
Lluciese na enxaradiella,
Compangar afurfugados
Tamién cola media güelta;
Y al cabu fartos de blincos
Facéisvos la riverencia;
Y e´nes manes del mozucu
Rendía ta la montera.

Echáis dos cuartos de sidra
Del carru xunto á la vera;
Y atapináa de perdones
Van ufrendate á la neña,
Q´un ramín de siemprevives
Ponte´n picu zalamera.

¿Y que non hebes historia,
Diz alguna mala llengua?
¡Dalgún collón que na danza
No ye pa meniar la´stiella!



ENRIQUE GARCÍA-RENDUELES