Boquerizu - Asturias

LLUNES

Los que ñacen en un llunes
(con dalgunes esceiciones)
suelen ser mu folgazanes,
veletes y durmilones.
Son blancos, repositaos,
y dayos por embarcar;
también por ser pescaores
y en toes coses tratar.




MARTES

Estos serán enclinaos
a coses de religión
y, como tou devotu,
muy falsos de corazón;
y de palabres, lo mesmo:
gafos y dalgún lladrón;
pero aquel que sal honrau,
yelo´u sin comparación.
So sinu, po la melicia
o por otra profesión
de sangre y ruin los llama,
en fín, ond´haiga función.




MIËRCOLES

Los q´en miércoles ñacieren,
puen llamase dichosos
pos serán espabilaos,
sotiles, mu enxeniosos.
Si tomen dalgún oficiu
o cualesquier profesión,
farán coses admirables.
Si anden´u navegación,
o van a tierres estrañes,
golverán con güen bolsón.




XUEVES

Los que´n isti día ñacen,
po la Iglesia tirarán,
o bien por otres carreres
de les d´Universiá.
Pacéficos, mu llanicos
y bon calletre tendrán,
y serán farto exustaos
en´l sorber y el xintar.




VIERNES

Llevaos po´l´utru sesu
los q´alleguen a ñacer
en viernes, tienen que selo,
pos Venus ansí lo quier.
Suelen tener llarga vía;
po´l estudiu non darán,
pero per aquelles artes,
que belles suelen llamar,
si´l focicu´n elles metien,
¡qué delles coses farán!
Llimosniegos, y non poco;
y falar bien, sin igual.




SABAO

Los sabaínos son recios
y tamién son pensaores,
pero lo más malo ye
que son abondo traidores.
Pa les cencies, non hay otros,
pa les artes, los meyores.




DOMINGO

Ye´l meyor sinu´l del Sol,
pos Dios en´l descansó,
y a los q´en domingo ñacen,
de bondaes enllenó.
Son mu guapos y bien fechos,
tiesos, de bona razón
y de güen entendimientu,
recataos, güen corazón.
Enclinaos a la melicia,
en la que gran pusición
afayen, si en ella entren.
En domingo ñací yo.



Juan Francisco Fernández Flórez

La Olla Asturiana. "Sinu pa los que ñacen en cad´un de los díes de la semana"