San Martín de Trevejo - Caceres

Estuvi en o lugal o día d´a Crú.
Trataí de localizar algún furistas, pero sólu pui vel a Fontinova (que aligría me liví), a O Saltu y a J.L.
A os demáis tratí de velos, o de que me viran, pero a algunhosnun os coñozu.
Me hubera gustáu salual y departil con Alfena (por máis que meesforzu nun o localizu) y con Nachitu (que de habelo vistu nun me hubera despistáu)

Cumu didi Fontinova, esperu tel máis ocasiós de felo.

Vaya esta décimas cumu recordu de esi día.

Con os milhoris deseus de que a Crú vos conceda cuantu le pistis.

B_RODAS

VIVENCIAS D´O DÍA D´A CRÚ

Tenin mui poicu valor
estas décimas que faiu
en un-ha tardi de maiu
deiantri d´o ordenaor.
As é feitu, ¡si señor!,
con aligría y sintimentu,
con mutu cuñucimentu,
con cariñu y afición;
y con o mei corazón,
y con algún fundamentu.

Cuandu chegó o día d´a Crú
- cumu ya tiña pensáu -,
con o traji, ya remuáu,
nâ máis qu´o Sol puxiu a lú;
de ilusiós ei ben cargáu
m´encamiñi p´o lugal
porque le quiría redal,
a Crú Bindita que temus,
y que os mañegus queremus
y sabemus veneral.

Cuandu a O Cabezu chegaba
y atisbaba en-ho horizonti,
alí n´a falda d´o monti
que Xálima resguardaba,
as salvas ya se escutaban
y a festa se percibía.
Era cerca meiudía
cuandu en o Forti aparquí,
contentu me encamiñí
a Iglesia con aligría.

Ya se oivin as campanas
as salvas o ceu atroan;
afora hai mutas persoas.
Os maiordomus se afanan;
a xienti ten mutas ganas
de poela acompañal
por as callis dó lugal.
Y levala, si é pricisu;
mais pensa tú, que pa isu
as forzas nun poin faltal.

Y dispois de misa vas
y te tomas un-hos viñus
con parentis y vidiñus.
con forti apertón de m´as.
A Fontinova salual
foi un-ha grata experiencia
é homi de gran prudencia.
Tamén a O Saltu saluí
y a Jota Ele que o ví,
aunque nutí algun-ha ausencia.

Un-hos músicus tocaban
debaxiu d´o Axuntamentu;
mais chegó logu un momentu
en que naidi os escutaba.
Meditabundu ei pensaba:
estis musicus que tocan
puían dilsi a mollal a boca
con un tragu d´o porrón,
o con agua d´o pilón
y aproveital a bicoca.

Nun estaba o turroneiru,
esi que viña d´Os Foius;
naidi había en aquelis poius
dondi poel gastal o iñeiru.
Y pensas un poicu en seriu:
¡Cúmu as coisas han cambiau!
¡Que aunque haiamus mellorau
sempris te quean añoranzas!.
Y sin perder a esperanza
vas y miras p´otru láu.

Y Por a tardi a levamus
por O Forti p´a sua ermita.
A esa nosa Cru Bindita
penas y glorias contamus.
Homis y mulleris vamus
despacitu, camiñandu,
un-hos por que a van portandu,
otrus a pasal o ratu,
quizá otrus fendu un tratu;
otrus mutus van redandu.

Chegandu abaxiu, en o llanu,
a metin p´a residencia;
y alí sólu sua presencia
conforta a nosus ancianus,
esis que duranti anus
a pueran acompañal;
agó sólu a poin miral
porque as forzas ya le fallan,
dispois de tantas “batallas”
que tuveran que libral.

Cuandu a tardi finiquita
y o Sol s´oculta n´as cumbris;
siguindu vellas custumbris
a metemus pâ sua ermita.
Y alí mismu a Crú Bindita
te damus gracias tamén
porque nos das mutu ben.
Y mentras volvis, subindu,
a esi Cristu le vas pindu
poel volvel o anu que ven.

B_RODAS (mayo 200

Pues sí, estimau paisanu y contertuliu Brodas, enfrenti da igleisa nos encontramus por primeira ve Fonti Nove y ei. Nos saluamus comu si fóramus vellus cuñucius o cuñucius de toa a via. Creu que foi o mismu Fonti Nova o que me dixu que cria que algún furista mais andaba por o lugal y entre elis Brodas. Dispois que me explicara quin eres y me dixu a familia y o uficiu, insiguia te recurdí. M´acordu da haber estau sentau en a porta de tua casa esperandu a que se abrira o baili do Gatu. En fin, otra ve será pero ei ya te teñu localizau.
Un abrazu pa ti con cariñu de tei paisanu Alfena.
Abrazu que fayu extensivu a tos os furistas, en especial a meis amigus O Saltu y Viky, nunca será bastante o nosu agradecimentu a o que fain por nosotrus y a amabiliai conque cuidan da nosa horta y a casa.Un abrazu muy forti pa os dois y repitu, gracias por to.
Soidi a fala

Amigu Brodas: en certa ocaxión te dissi que tardabas enentral,pero cuandu te decidis o fais pora porta grandi.

¡Me quitu o sombreiru!

Foi un placel, darti un apretón de mas.

Un abrazu,FONTI NOVA

PD.Tamén, ha síu mui agradabli conhocel a Alfena i a sua familia.-Meis respetus a sua Senhora.

Estimau Brodas, os que num hemus puiu dil esti anu a Crú Bindita, a hemus añorau, peru nos quean recordus de antis.

O que si queru darti a "enhorabuena", por o ben que está describia a "poesía" que nos as deleitau en esti foru, con motivu de a festa de a nosa Crú. Poirán igualala, pero num millorala.

Ánimu Brodas y sigui escribindu cuandu poyas.

Salu pa "fala", furistas y mañegus.

Chalrrieira