San Martín de Trevejo - Caceres

Boas tardis:

Pareci cumu si nos hubéramus ulviáu de esis visitantis, de esa familia, que habíamus dexiau en o cruci de a calli Batuecas con a Palla, pareci que han tíu sorti y se han encontráu a bôs manhegus trasegandu vinhu (trasegandu de un-ha tinaxia a otra, nun nos confundamus).
HOME: sempris cairá algu tamén pá o buchi.
He estáu pâ terra de María Santísima, un-hos días, (que sempris resultan poicus, aunque sobrepasin a udia de elis), pur isu a familia esta se ha queáu p ará.
Siguimus con ela, y o recurríu que han feitu en a çultima hora, máis o menus asina:

13
Tô aquilu le está gustandu,
y miran embelasáus,
que pâ cualquera dos láus
poirán siguil camiñandu.
Pero estaban trasegandu
en a pichorra de Chitu:
- Vindi p´acá, vos invitu
a que un bô vinhu probéis,
que as coisas millol veréis
dispois de eitar un traguitu.

14
Y foi verdáis, ¡sí señol!
Dispois dô que habían catáu
os tozós a dambus láus
se aprecian mutu millol.
Se diría que otru colol
se adivinaba en o ambienti.
Y a familia diligenti,
agarreitus por a mán,
chegan a calli San Xuian
dondi baixa boa corrienti.

15
En a esquina, mentras tantu,
ven aquel gran caseirón
un-ha imponenti mansión:
a vivienda de Don Santus.
Tô que ven ten mutu encantu
y entoncis a cumitiva
trepa aquela costa arriba,
chegandu hasta a calli A Ciái
que presenta a realiái
das coisas máis primitivas.

16
É un-ha calli sin igual,
dô milluritu que temus.
Nosotrus que tantu a vemus
nun sabemus aprecial
un sitiu tan singulal.
Hai algun-has escaleiras
das que quitorin as peiras
confundindu con progresu
empleal mármul o yesu
e inclusu pioris materias.

17
Fai un ratu que han entráu
en a boiga de tíu Luis,
pues o que vivi en París
con agradu os ha cunviáu.
Con o corpu ben saciáu
ya poin siguil otru ratu.
Han recibíu un bô tratu;
le encanta tô que están vendu:
con a cámara van fendu
afotus y bôs retratus.


18
Van hasta o pilón d´as Hortas:
nun levan roipa adecuá:
nun poin subil a calzá,
y decidin dalsi a vorta.
Tamén han vistu un-has portas
con culuríu estridenti,
que discrepa con o ambienti
añosu y tradicional
que se aprecia en o lugal,
en as casas, en a xienti.

Ya veremus por dondi tiran, quizá por a caleixa d´o Portu hasta a calli a fonti, dondi tiña tiu Marcilinu o cini y antis tamén tiña tiu Jacintu un-ha fragua, dispois hasta a placeta d´o estancu de Sebiu, y ya continuarán, si elis querin, dandu un-ha volta por otru láu.
Forti abrazu

B_RODAS

Mui boa amigu Brodas,mais que Brodas, siria "Bordas"porque é que as "Bordas".Ya veu que sabis leval a esta xenti por os bos sitius, aunque si siguin asi, nun se cumu van a acabal.Esti de Paris se alegra de que os haya mitiu en a boiga de tiu Luis, aunque ali os turistas primeiru entran pa dentru i dispois ya os invitu.O que me extraña a mi é que estandu Chitu de trasegu, a mi nun me hubera cheirau.

Un salù a tos os furista i soidi a fala

Amigu Brodas, os airis de levanti impregnaus de esi finu tan cuavi que hay en O Portu, seguru que han propiciau, que otra ve, con esas rimas tan ben treidas, nos metas en o lugal a tos. He certu que a os imaginarius amigus de fora os mandí royu arriba, que viña cheu, pa que nun se perderán aunque ya divan "orientaus", dispois le pirdí a pista, tu sabras por dondi foran. Un abazu. Soidi pa tos y pa a fala.Chitu.

Vos acordeis cuandu dixi que se le dera o premiu a o millol poeta do foru a Brodas,tiña radon o non?
Buenu volvu a insistil,en a proxima festona le debemus entregal o premiu a Brodas,nun me digais o gustadu que da lel as poesias de esti geniu mañegu.
Forti abrazu

É verdais que se agradeci lel estas poesias .....muy boas Brodas.
Nun deisis de escribil!!!

Anduriña