San Martín de Trevejo - Caceres

as fotus da polemica

https://ww.jam-montoya.es/galerias.htm

https://ww.jam-montoya.es/sancto/fotos.htm

A bronca, protestan os obispus, que paredi que hasta hoixi nun sabían ná, protesta o arzobispu de Toledo, fendu referenza a Virgin de Guadalupi y a os sentimentus dos extremeñus, tô se comprendi i hasta se entendi; protesta o PP i UPN (Unidad del Pueblo Navarro), tamen se entedi pol o mismu que o "das primeiras peiras" peeeru... que o faia o ¿sindicatu? Manos Limpias me desconcerta, peru seguru que ten sentíu que o faian.
O que ei idía, que agora nun va a queal pichirichi viventi que nun vea as afotus de marras; millol publiciai i mais barata o sr. Montoya nunca poiu imaginal.
Soidi a Fala

Soy Chitu, teñu ten o ordenaol con o que escribu en o foru, eschapazau y tamen teñu algu que idel, lástima que o anterior escritu nun poi sel por que , por a averia, se ha diu por esas redis do mundu. En fin, que idia ei que os retratus son un auténticu insult pa os creyentis y que esi usu de a libertai de expresión, sea o non artística, e un abusu, por que o mismo que repetu a quin teña cualquel otra religion o creencia, o que nun a teña siquera, y a mi non se me ocurre menos precial niñunha idea o simbolu, exiju pa mi o mismu respetu. ¡Ah! y que de puritanismu na, por que a mi me da igual que se retratin o que se publiquin figuras encoiras, mais o menus guapas, sin son guapas millol pa tos, o en posturas o situacíos sexualmentei explicitas, me da igual, o que queira que vea y o que non, con mais o menus hipocresía que nun vea, o que me molesta y firi a miña sensibiliai religiosa, e que detrás de esis modelus, hay algun mais, hay unha representación de figuras que consideramos divinas por que asi o creemus, sin perjuiciu de que se sea mais o menus practicanti, pero hay unha fé macillá y non se poi toleral tamañu insultu, si insultu, por que se ten conciencia de que nun solu fendu os retratus, sinón publicanduos, se vaya lelvantal polvarea. Os medelus ni as situaciós importan, importa o que se expon detras, com se visti a os personajis y como se usan simbolus que, pa os creyentis son intocablis.
Otra coisa e, como he ditu en esi escritu que se me ha pirdiu, a oportuniai. Ya sabeis o refran, cuantu mais se movi, mais cheira, aqui alguin ha moviu y tamen isu e censurabli, sobre to cuando con esi movimento se pretendi desprestigial a o rival, sin pensal que tan mau e fel unha coisa como divulgala, por isu le doi a radón a os que critican a divulgación. E normal que o Cardenal de Toledu exija reparación, está en o sei dereitu y en a sua función pastoral, pero como to e opinable, tamen dibia esi cardenal de fel o posibli por devolvel Guadalupi a Extramedura, e idel que o Monasteriu y to sei patrimoniu se quee baisu a jurisdicción de o obispau de Cáciris, que e donde pertenici territorial y civilmenti.Se puia idel mutu pamis, pero ben está ao que está ben. Non mais divulgación,. Sopidi pa fala y pa tos, Uns saluu de Chitu

Entoncis tu estaras de acordu con os atentaus dos moirus a as embajas nordicas, cuandu o das caricaturas. Por que simbulus comu mahoma son intacablis pa esa llenti que ten fe en elis, y os martiris que se inmolaran o que puseran as bombas son religiosus que cumplindu a sua funcion pastoral de extendel o islam por a gracia de Ala.
Que insultu, poñel a Mahoma con una traca de dinamita.

E mais, esas bromas y esa llenti que se meti con que os extraterrestris, que didi que son mintira, y que fai series de television y peliculas. Isu nun e arti ni e na, por que hay llenti que ten fe en que os extraterrestris os van a leval a sei planeta, y pa elis esis simbulus y creencias son sagras. Desde logu, que llenti mais irrespetuosa os productoris de Expediente X...

Estas fotus: son, un-ha profanación da fe cristiana.

¿Que sintíu tenin sacalas de novu?. "¡O sabemus tos!".

" ¡Pater!, dimitte illis non enim sciunt quid faciunt" (Jesús de Nazaret).

FONTI NOVA

Bôs días teñan os que leen esti foru i os demais,tamén.A
A Fontinova, teñu que ripitirli que ei sólu chegué a revalida de cuartu, y con cincu raspau en latín; i cumu d´isu fai mutus anus, as citas que fai nun as entendu, peru as intuio.
Tés muta radón eno que didis de volvel conas afotus, pois ei creu recoldal que fomental o escándalu (agora , mutus dagalitus tenin a oportuniai de vel-las)
,Jesús de Nazaret o senaló como un gravi pecau.Ao autor das afotus, nun creu que isu mutu importi, peru ¿ o seis denunciantis, cristianos i católicos, apostólicus i romanus debin de fel confesió?
Sin mais, se vos salua a t@s.
Soidi a Fala

Totalmenti de acordu contigu, istu nunca se debeia fel, o que nos falta por aclarar porque han seido agora, é que as han voltu a expoñer o é que has sacau porque interesa por as fechas en que estamus, quen o sepa que ó diga, porque en os periódicus de Extremaura está aclarau.
Bueno y por favor nun nos fayas agarrar o diccionariu, ya sabemus que te expresas muy ben en latín, eí o aprubí y ya nun me acordu de na.

BAYLE.

SOIDI A OS FORISTAS Y A LA FALA

BAYLE: Nun sé mutu máis que tú destas fotus. Por o que tenhu entindíu, se fideran en o anu (199-almenus parti delas-.
Pareci sel, que,por estas fechas,un-ha galiría privá as expúixu en a Iglexia de "San Francisco Javier" de Cáciris (Tamén Chamá "Iglesia de la Preciosa Sangre").En cuantu a edición dos catálogus,creu, que son do (2003).

Tamén pareci sel, qué, en máis d'un-ha capital Espanhola,san expostu estas fotus con ayuntamentus de tos os coloris.

<<Comu hóixi vali tó>>. Contal de consiguil un-hos objetivus: ¡na se respeta! ,se profana,se humilla,se minti...

Enfín,é própiu do sel humanu,acabal con to bo que ten,i dispois a choral a pérdida.

Un abrazu,FONTI NOVA

Amigu "Un que mira", me diriju a ti por que me pareci que me contestas directamenti y, o non has liu ben o que he escritu o non te ques enteiral de o sintiu que ten o que escribí. Non estoy de acordu, ni con quen ridiculizó a mahoma, ni con quen, en o usu fanáticu y desmediu de a sua creencia, atentó tamen contra otrus y causó malis de considerabli graveai. O feitu de que se responda por parti de o creyenti de unha religión de maneira desmedía, e mais, inclusu en contra dos principius auténticus de esa relgión o doctrina que nun e tan violenta, aunque se fali de a guerra santa, nun ten na que vel con que o agraviu exista ¿acasu hemos ditu os que criticamus esa publicación que fusilin a o autor o que o desterrin? Non, solu nos hemus sintiu ofendíus y o hemus feitu mereceol de a nosa reprobavación. Unha coisa e non aceptal o, inclusu, critical con crudeza unha creencia religiosa y otra distinta e ridiculizada. Se poi critical a inquisición y hasta as cruzás, pero sempris que as criticas ni poan insultal ni sean motivu de escandalu pa nairi. . As creencias y os sintimentus relisgiosus, como se halojan en o mais profundu de a intimiai personal, pa mi por lo menus, merecin o mais grandi dos respetus y consideracios, sin perjuiciu de que esté o non de acordu con a creencia de que se trati:. To mais que poyu idel, si non estoy de acordu con o que predican, e que se equivocan, na mais.
Nun hay que confundil a afición con a devoción, pues mentras unha e un sintimentu de simpatia por algun tangibli que gusta por velo o por que atrai, a otra e algu mais ítimu y profundu, mais espiritual si ques. Por isu cuandu falas de aficios esotéricas y creencias de esi estilu, teñu que idelti que aunque non se poi comparal unha ceencia de esi tipu con unha creencia religiosa , tamen merecin respetu y si alguin cree firmimenti que e hay extraterrestris y que vendrán a salvalos y to o demais, si con con isu a naidi molestan, hay que respetalo y , sobre too, non ridiculizado, que ahei e dondi está o mal.

De religión, como de política., hay que tel mutu cuau como, cuandu, dondi y con quen se fala, por que movendunus en o campu das ideas e muy facil malinterpretal as coisas y acabal, sin querelo, idendu algu que poi molestar a o interlocutor. Por isu, tos temus que tel mutu cuau, con o que idemus, escribindu, ya que falandu frenti a frenti e distintu por que se poi aclaral o corregil de inmediatu. En fin, que na mais, ya por oixi, te deseu soidi y tamen pa tos os contertulius y, como non, pa fala, Un saluu Chitu.

Estaba usando una hiperbole, nun esperaba que estuveras de acordu con os atentaus, ni mutu menus.

O que ei queiru idil e que a libertai e a libertai, y que nunca chovi a gustu de tos. Y si recortamus a libertai pa publical porno (con a virgin o con quien sea cumu actuacion estelar), y recortamos a libertai pa tratal temas de religion, a o final ni e libertai ni e na. Te en conta que o piqui dos moirus nun por que as caricaturas foran ofinsivas, sinon simplementi o por que seia en elas o profeta, coisa que esta prohibia pa elis.
Si ei consideru que pintal a o mei profeta he ofensivu, e intentu impoñel a censura pa que nun se le pinti, ¿dondi esta a libertai?.
Si pretendu que nun se publiquin o se censurin unas fotus de jesucristo en plena masturbacion, ¿dondi esta a libertai?. Te poy gustal, te poy dal arcas, te poy ofendel, pero que ei sepa nun va contra os dereitus humanus, ni naidi te obliga a que o compris ni o miris.

Y o dos extraterrestris, nun falu de aficionaus a o sobrenatural. Falu por ejemplu da secta dañina da cienciologia. Arei hay llenti que se cree a pies juntillas que os extraterrestris vendran y se os levaran, y si elis tuveran a norma de nun pintal a os extraterrestris, ¿os deisarias tu de pintal pa non ofendelos?

Un nun poi intental impoñel normas morais a naidi, por que a libertai esta en a diversiai, y as religios que se imponin sobre as dos demais son de to menus libertarias ni respetuosas.

O tema de que se subvencionaran o no as fotus, e ya otru muy distintu. Desde fai una decada se leva subvencionandu cualquer coisa que se intenti vendel cumu arti, sea bo, mau, o autor necesiti o diñeiru, o non.
Por ejemplu, to o cini español va subvencionao, o bo (poicu), o mau, o muy mau, y o de Almadovar, que se seca o cu con billetis de 500, pero que le paga o estau casi to a produccion das piliculas.
En esti tema nun hay ideas politicas, colores, dereita ni izquerda. Hay leyis que se fideran a basi de malitis cheus de diñeiru y que niñun gobiernu toca.


Sin acritud, un saludu pa vos.

Pa dal por finalizau o tema, en o que pareci que discrepamus en cuantu a o limiti de a libertai de expresión, ya que ei consideru que esas formas de expresión artística, por atentar contra os sintimentus religiosos de muta genti, son reprobablis , te queru recordal, que, aunque a nosa Constitución reconocí en o art.20 o dereitu a expresarsi librimenti y a que non haya censura previa, esi recoñucimentu e genéricu y de a misma maneira que en o art.16 recoñocendu a libertai de cultu y a ideológica se impón como limiti o manetimentu do ordin publicu protegiu por a Ley , esa libertai de a que tu falas l encontra o limiti en o Códigu penal, a vedis, por que en otras está sencillamenti en a libertai de os demais . Agó, abusandu un poicu de a tua paciencia, te poyu asegural que esa publicación puia habeli acarreau un disgustu a o autor si alguin se hubera querellau contra él, ya que en o Códigu Penal, hay dois articulus na menus que protegin a os lugaris destinaus a cultu religiosu y expresamenti a os sintimentus de cualquel confesión religiosa, ( art. 524 y 525 ). Esti ultimu concretamenti castiga a quin, pa ofender os sintimentus de cualquel confesión religiosa, faya publicamenti, de palabra, por escritu o meyanti cualquel ripu de documentu, escarnio de seis dogmas, creencias, ritus o ceremonias etc,etc, ( leo). Por tantu, un libri de publical cuanas barbariais queira, pero tamen ten que responsabilizarsi de o que veña logu. A publicación pederasta, poi felsi, de feitu se fai, pero tamen hay mutus ditius a conta de isu.
En cuantu a que nun vaya contra os dereitus humanus, que tamen son algu genericu y , como toa declaración precisan especificación, habría mutu que falal.
Por tantu, sin querel imppoñel normas moralis a naidi, por que ca un e libri, aunque tampocu e ilicitu o tratal de felo sempris que sea con radós y sin violencia, mantendu que pa mi, o feitu, e un abusu de esa libertai individual y que, a mei juiciu, poi sel hasta sancionabli, doy por cerrau o tema. Te mandu un saluu, extensivu pa tos os componentis de o foru. Soidi pa fala . Chitu

Referenti as famosas afotus, creu que estamus pasandu por artu un-ha coisa impoltanti: Se han publicáu con iñeiru públicu.

Evidentimenti ca’un se poi expresal (dentro de un ordin) cumu millol le pareza. ¡Faltaría máis!

Creu que o tal Montoya é muy libri de fel afotus criticandu a Igrexia Católica, a os musulmás, a os budistas, a os hare krishna o si quel a o Real Mairil, a O Real Betis, a Curro Romero o a os cantis por solearis. Pero que sea con sei iñeiru i nun con as perras de tós.

Pero ¿qué pensarían os contribuientis mairidistas de un lugal (por ejemplu Vilamel, Córdoba, Trujillu, Cuenca o Guadalajara), si con o iñeiru sei o Axuntamentu se dedicara a fel caricaturas d’o Real Mairil? ¿Qué poin pensal os otrus contribuientis, que nun simpatizan con o Real Mairil? ¿Nun hai milloris coisas en que gastal o iñeiru d’un cuntribuienti?

Pues esti é o mismu casu: se han gatáu cuartus d’os contribuientis en istu.

A mi, personalmente, as talis afotus me parecin un insultu a os que somus (máis o menus) creientis, a os que temus esis sintimentus.

Nun queru entral a consideral a coisa artística (que isu é opinabli).

Ni siquera me vali o de pil perdón. Hai que restituir. En esti casu os iñeirus as arcas públicas. Repitu, si o tal Montoya o cualquel otru quel critical a algun-ha coisa, ten plena libertái pa felo, pero, me negu a que sea con iñeiru d’os contribuientis.

É o mismu casu que si os de Gescartera, Filesa, Mariu Condi, Roldán, Vera, os d’a operación Malaya de Marbella se limitaran a pil perdón. Me trai sin cuáu. Inclusu me importa poicu si os metin en a cárcil, ¡me trai sin cuáu, tamén!. O que tenin que fel é devolvel o iñeiru, si se demostra (en algun-hos casus se ha demostráu) que s’o levorin.

D’o demáis se ha faláu (escritu) bastanti en esti foru. Sólu quiría aportal a miña opinión.

Boas noitis y que teñáis un bo din de Semán.

B.RODAS (contribuienti d’a hacienda pública de Extremaúra)

P.D.

Ei sí estudií latín (bastanti) , y o que nos didi Fonti Nova (gracias amigu) se poi encontral escritu en castellanu por a metái d’o capítulu 23 d’o evangeliu de San Lucas.

CONTRIBUYENTE: Persona obligada por ley al pago de un impuesto. Dícese del que paga la cuota que le cabe por un impuesto o repartimiento. (Real Academia Española)