San Martín de Trevejo - Caceres

Cuandu um pasa dos cincuenta empeza a recordal tempus pasaus, hoixi
me ven a memoria aquelas Semás Santas cuandu ei era dagal.
Recordu cumu seiamus poras calhis tocandu as chalrrieiras i as matracas,
aquelas trabas cum algolas que se feian soal a giru de muneca, cum elas
anunciabamus os uficius i tôs acunticimentus riliixiossus qu'habia, pos
desdi Xiovis Santu hasta Sábau de Resurrección num tanhian as campanas.
Era imponenti vel aquel monumentu que se levantaba dondi se guardaba a
No Senhol, divamus a velal por turnus por espaciu d'um'a hora, te puia
tocal de noiti o de mairugá, asi hasta que resucitaba.
As procesions eran solennis i de muta devoción, solu se uivian os cánticus, subriculhia o do enterru, cantau por aquelas vodis gravis de
tiu Fernandu o de tia Lorenza, Tiófilu o pairi de Mingu, mei güelu Luis
i algun mais que ia num recordu, se te punhia carni de galinha.
Se vivia a Semán Santa, num entru cum istu a querel idel si aquilu era
milhol o piol, era o qu'habia i nos toco vivil.
Agó ia sabemus que distintu, pâ algum'os um'as mini vacacions, pâ otrus
a celebración riliixiossa, hai esa libertai de eliixil, num se nos impón
ná, ala câ um, as imposicions num son boas, crean rechazus.
Deseu que tôs os qu'habeis puiu dil estis dias ao Lugal o esteis pasandu
ben, câ um a sei estilu, os demais a esperal otra ocassión.
Soidi pâ tôs i pâ Fala.

Estimau amigu Nachitu:
Me acordu que os Yovis Santu a partir de as cuatru de a tardi seyamus de a Plaza a tocar, cumu tu ven didis, as Chalrrieiras y as Matracas, a dali unha volta a o Lugal, pa informal de que os Santus Oficios diban a sel dispois.Tamen se bindidia a agua o Sabau de Gloria, que se chamaba antis así y as persoas que quirian "Agua Bindita", diban a Iglesia con unha Yarra en a Pila Bautismal, se le entregaba a "Agua ya bindidia".Tamen o Yovis Santu se feya o Actu de "as Tinieblas", que consistía en estar en o Coru y dispois de os redus, se tocaba as "Chalrrieiras" y as "Matracas" un ratu y ya dispois se acababa y te mandaban pa calli.
Tamen duranti os Santus Oficius de esis dias, en a Iglesia, nun se tocaba a campana pol os Monaguillus y se tocaba a su vez unha "chalrrieira pequena".
Soidi a Fala.
Chalrrieira.