Recordus do pasau. Boas noitis a tôs. Ia pareci que estamus de vacaciós, o foru esta ena temporá estival. Esta manhan mentras via o encerru de Pamplona e uiviu cohetis, eran cunductoris profesionais celebrandu sei Patrón, San Cristóbal. Tal dia cumu oixi me licenciorin, sirví en automovilismu, cumu num, ena octava cumpanhia do ministeriu do ejércitu. Istu num ten ninhum'a importancia, peru ma vindu o recordu de um bo manhegu que mutu fidu pol seis paissanus i pol otras xientis de otrus pueblus do arreol de Sâ Martin. Don Eutimiu Carreteiru, cumu a mí, recomendo un numeru indeterminau de xienti tantu pâ fel a mili cumu pâ quen quiseira fel carreira ena Benemérita, numca tuvi opurtuniai de agradecelselo en persoa. Vaia desdi aqui mei eternu agradecimentu pol tô ben que nos fidu. Tôs cunhuciais a esti homi, persoa sincilha i amanti do Lugal i tô relacionau cum o mismu, aunqui tardi, queru fel esti pequenu homenaixi en recunhucimentu a sua persoa. Num estaria demais dedicarli cum sei nomi um'a calhi, cumu se dedico en sei dia a de Diegu de Santiagu, otru célibri manhegu. Num queiru parecel pedanti cum esti tipu de coixas, peru habrá máis xienti que tamén merezan otru tantu. Nos correspondi a tôs os manhegus reconhocel aquelis que fideran algu bo, ben por o Lugal, por suas xientis o por divulgal fora das nossas lindis o manhiguismu. Forti abrazu pâ tôs i larga via a fala. |