Nun hai que ulvial o periodismu Nun se ei si ha habiu otru momentu enha historia dondi o periodismu haya gozau de piol imagin pa o gran públicu. Por un lau, as innumerables tertulias que hoxi en dia copan as programacios de televisión o radiu con futbul i politica comu as duas grandis temáticas) parecin estal dexaproveitandu unha gran oportuniai de mostral as virtudis de a profesión, convirtindusi en meras discusios dondi caxi sempri unhus opinan en unha dirección i otrus en otra. O espectal ya dá por sentá essa falta de objetiviai i rigol enhos analisis. Y por otra, a enormi prexencia de as reidis socias enha via de o ciudadanu le provoca otra piligrosa impresión; que quizás nun faya falta acuil a un meyu periodisticu pa estal informau hoxi en dia. Pero cuiau porque unha coixa e lel noticias i otra entendelas. Y otra que sean verdai. O igual que o gremiu dibiria fel autocritica sobri comu se estan ejercendu duas funcios con a socieai, tamen os ciudadanus dibirian concienciarsi de que sin periodismu nun se poi comprendel o que pasa enho mundu. Anti a avalancha de información que recibimus hoxi se antolla fundamental verifical as fontis, coñocendo o contextu de as nuticias, e inteirarsi por suas cauxas i consecuencias. Y to ilu solu o poi ofrecel o periodismu. SAN PEIRU XIV |