San Martín de Trevejo - Caceres

Bôs dias teñan os mañegus, as mañegas, y cuantus lean esti foru.
Hemus voltu d´a terra de María Santísima sin maioris noveáis, o cual, en os tempus que corrin, é gratificanti.

Bueno: habíamus dexiáua esta familia en a iglesia, discutindu con intindíus si os cuadrus de Morales os habían roibáu algun-hos mañegus (en Alcántara, alguén pensa asi), o si era parti de un pagu promitíu por favoris en determiná guerra, que os de o Hospital (Malta), le fideran a os de Alcántara.
En fin, quizá esi tema puiríamus sacalo en otra ocasión.
Agora veremus cumu os sevillanus, sain d´a igresia y siguin vendu as mutas coisas guapas que ten o nosu lugal.

Quizá fideran un recurríu máis o menus asina:

25
Sain por a porta traseira,
chegan a calli Hospital,
antis han tíu que baxial
piligrosas escaleiras,
feitas con compactas peiras.
Tamén despacitu van
por calli San Sebastián:
un antiguu barriu hebreu.
Nun penseís que é cachondeu,
o corrobora Julián.

26
Entre peiras y paredis
pareci intuirse o valli.
Alí dondi acaba a calli
moraba tiu Nicomedis.
A hemus vistu tantas vedis,
un-ha calli que se empina
“O Corchu” se denomina.
- ¿qué es la “Boiga de cumías”?
- Aquí Julián tôs us días,
nos repón as vitaminas.

27
Moraba tíu Sebastián,
un zapateiru artesanu;
tiña un fornu tiu Solanu;
tía Juliana y tíu Román
despachaban ricu pan.
Había un-ha carpintiría
de tíu Sindu y tíu Matías.
Ángil y José un-ha fragua,
en dondi en tempu de agua
se chalreaba y departía.

28
Miran p´atrás desde arriba:
ven un-hos cancháis de meu,
Torris de Fernán Centéu,
que con esa forma altiva
gustan mutu a cumitiva.
Sopla forti ventoleira
en o cruci con “Correira”,
en dondi, fai mutus anus
daba “pasu” don Ciprianu,
insinandu boas maneiras.

29
Van camiñu d´o Pilón
dondi tiña tiu Rosariu
tenda de artículus varius,
sobre tô: alimentación.
Se sabi de boa radón
que sempris puirías probar
xiaringas de bô yantar.
Ver a Colás o albardeiru,
Maximín o retrateiru
y Chón a de tia Pilar.

30
Muy cerca de esi pilón
miran o antiguu mateiru.
Alí chivus o terneirus
mataba Alfonsu o “Landión”.
Hoxii cumpli otra función
homenaji mortuoriu:
é sala de velatoriu
dondi dispil dignamenti,
esis mañegus ausentis,
o redali un responsoriu.

Ya se está acabandu a visita, entre otras radós porque se acaba o lugal.
Ademáis, me han ditu que querin chegalsi por lo menus a Coria, que tenin alí un-hos parentis.
Ya veremus si fain noiti en o lugal o se van y volvin en otra ocasión.

vos deseu muta soidi.

B_RODAS

Brodas que pasa con O forti,se te a ulviau.
Forti abrazu

Siguis en la misma línea y continuas transportandunus xunto a os visitantis ¡ah! Muñu, sí fala do forti aunque non de o "tei forti" que está mais pa baisu, si huberas arreglau a casa ya, falarian de ela y dirias tu mais a menú ¿Que te pareci?. Un abrazu, Soidi pa tos y pa a fala, Chiti.