San Martín de Trevejo - Caceres

Corrin maus tempus p´as persoas que tenein se ven ubligás a emigral a paisis da Unión Europea.Sempris Europa ha siu referenti en o estau de bienestal y en a lucha pol a convivencia y a democracia. ¿Agora tamén é así?.
Tenin o mismu problema que ocurri en as Autonomías muy avanzás: o envellecimentu da población y pol tantu, a necesiai de man de obra de emigrantis. Sí emigrantis, pero en tantu en cuantu sean a solución de os seis problemas. Que les sirva para gañal elis, comu un mal inevitabli. Pero, tamén tenin claru que nun van a asumil os costis en custión de dereitus sociais y humanus.
En Francia, por ejemplu, aproborín a Ley pa control da emigración, en a que se píi que tenin que demostral o parentescu con un test de ADN, se les exigi un examen de lengua y cultura francesa.Sarkozy aposta pol redudil a inmigración familial en favol da inmigración económica (alí sólu interesan os inmigrantis que van a traballan, nun a sua familia.
Bruselas, otru tanto do mismu, querin "atrel" a emigrantis cualificaus, é idil una inmigración selectiva.
O Estau español, ya o está fendu, aposta pol a contratación en origin, traballaoris que dependan de contratus pol temporá y un cupo limitau. Mutas vedis son utilizaus pa traballus en más condiciós, durus, con contratus si concretal, jornás inacabablis, a vedis sin pagalis as horas extras, con interrupciós de hasta 6 mesis pa evital que vayan adquirindu dereitus. Encima mutas vedis se genera una dependencia de o contrataol porque está en as suas más que continui con contratu o a o acabal se teña que volvel a o sei pais de origin.Por isu digu que, mutus dos os emigrantis de oixi son trataus comu man de obra pura y dura. Isu de que tenin que sintilsi integraus y motivaus pa traballal..., mentras traballin que mais da si están tristis o depremius pensandu en a familia que nun poin trel. Si "pasa" algu, ya vendrán otrus.
¡Ay,Europa, Europa!...Pol sorti nun tos pensamus igual. Hay mutus otrus sitius que tratan con respetu a xenti que tendu que sel de a sua casa pa gañal algu que millori a vía de seis fillus, sin embargu, son trataus con os Dereitus humanus y con a igualdai social que les correspondi.Bastanti desgracia han tiu de deixal a sua terra. A os mañegus y largarteirus nos soa mutu esta historia ¿non?
Me acordu agora d´o amigu Pirata, cuandu me idia aquilu de os empresarius explotaoris...Habelos hailos... pero cuantu mais lonxi millol.
Un saluu pa o amigu pirata, que pol certu cumplí y a nivel personal me envió o resultau da consulta que fidu sobri os traballaoris mayoris de 52 anus que tiñan que devolvel iñeiru que habían cobrau por indemnizaciós.
Soidi a fala.