San Martín de Trevejo - Caceres

Otru anu mais, convocaus por a Casa de Extremaura en Sevilla, hemus disfrutau oixi do ritual que supon a matanza, recordandu aquelas matanzas antiguas do nosu lugal, sobe to, cuandu éramus pequenus. ¿Quen nun se acorda en esis momentus de Tiu Cherepi q.e.d o de tiu Vagullu q.e.d, o de Casildu q.e.d., ya esti mais redenti? Aquilu era unha festa de familia y vidiñus, era motivu de aligria almacenal to a productu que daba o cuchinitu criau con to esmeru en as cortellas das boigas de casa de maneira que, a vedis, hasta daba pena sacrificalo, pero por encima de to estaba o resultau de aquel sacifiu, tan sabrosu, que duraba tantu.Oixi hemus estau, caisi tos os mañegus que vivimus aquí, con mutus extremeñus mais, disfrutandu, en una dehesa de Higuera la Real, en o sur de Badajoz, lindandu con Huelva ya, de a ceremonia de una tipica matanza, vendu como feyan os chuirizus y demais viandas, y degustandu bo jamón, esti curau ya, de aquela terra que o produdi tan sabrosu, con un platu de almodu tipicu de esas matanzas, sin meu a que o colesterol se dispari en a sangri que, por qué nun idelo, ya diva un poicu cargá tamén de otru productu, esti procedenti das boas uvas de paquí abaisu, cuidas tamén con mutu esmeru en bo robli das boigas Pacensis, que to mundu sabi cual é sin nombralo siquera, non sea que se piqui. Fincacha, un anu mais, ha lograu a milagru de dalnus de comel y bebel por unha modica cantiai con a colaboración do Axuntamentu da aquela localiai que nos recibí con tantu esmeru y muta amabiliai.Ali estabamus mutus mañegus. En fin, volvamus as tareas habituais, sin entral esta ve en pulitica que e unha palabreja que, como idia alguin, "hasta la mare estropea ". Soidi pa tos y un saluu de Chitu