San Martín de Trevejo - Caceres

He quiriu fel un aparti,unindumi a to o que didin os demais foristas que tamen suscribu, pa extendelmi un poicu mais, en esti sintiu ayos que queremus dali a Marcial, primu hermanu de miña mairi y por isu tiu segundu mei, a quen nunca trati como tal, sinon como amigu.

Insiguia que supi a nuticia me pasó por inmaginación, como unha pelicula, o estupendu ratu que esti anu unha ve mais, pasamus en a sua pichorra, acompañaus de seis fillus y noras, degustandu un monton de bos pinchus y bo viñu, disfrutandu, en definitiva, aunque o que mais disfrutaba era él, por que así de generosu era Marcial.
Homi autodidacta, ferraol, aunque logu foi ferreiru tamén, que supu adaptarsi a os cambius y as circunstancias.
Recurdu que primeiru feya ferrauras, a man, a marteladus, de maneira que de unha tira de ferru sabia moldeal o que logu era unha escultural ferraura que con habiliai colobaba en as pezuñas dos cabalus, burrus, mus etec..

Mais tarde a tecnologia le truxu un martelu elécttricu que feya un ruiu infernal, pero que moldeaba as ferrauras aunque él remataba a martelu a faena, dispois, cuando foran desaparecendu os animais de labranza, o inquietu Marcial, se dedico a o ferru y hasta chegó, en unha faceta que ei creu que ni el mismu cuñucia, a sel un bo comerciantí, que supu bregal con as amas de casa do lugal vendendu de to o que daba de si o comerciu y que alternaba con unha agencia de Benesto,( que istu mutus nun o sabin . un ferraol, agenti de Banesto, caisi na)
Marcial tamen tiña mutus coñucimentus de veterinaria, y como tal, ejercia a falta de titular en o lugal y nairi poerá idel que deisó de atendel a hora y o dia que fora a niñun que le pira dil a vel un animal enfermu ¡ A cuantus animais domesticus, vacas, cabalus, burrus etec., le salvo a via y acuantas axuó a trel crias cuandu os partus eran cumplicaus ¡. To istu o comentabamus esti verán en presencia de un amigu de Sevilla, tamen invitau a sua boiga, y él nun le daba niñunha importancia, por que así era Marcial .

Ayos Marcial, como en a paz que te deseu temen as de vel esti foru, que sepas que os que te quiriamus en via, te recordaremus con cariñu y cuandu vayamus a o Lugal, falaremus de ti con os paisanus, con teis compañeirus de partía,con teis fillus y parentis y hasta nos riremus contandu algunha anecdota tua, isu si eitanduti de menus.

Silvestra, Tinin, Jesus, Luisa y Marcial y respectivus conyugis, recibi, de toa miña familia un abrazu de condolencia y sintiu pesami y con o pensamentu que vos sirva de consuelu de que Marcial a o final tiña unha caliai de via estupenda y morrei sin habel pasau unha larga y dolorosa enfermeai, se nos foi y o huecu nun se vai a rellenar nunca, pero e ley de via, por isu y por que esta sigui y hay que vivila hasta que se nos acabi, resignación y pa Yaneri. Un forti Abrazu. Chitu.

Sintiu Pésame a Silvestra, fillus,netus y demais familia, por a morti de Marcial (q.e.d).
Aunque Chitu didi mutas coisas de Marcial, ei queru idel tamen, que a mi me ferró mutas vedis os dois cabalus que administrataba, que eran de meis Pairis (q.e.d) y puñia ven as Ferrauras. Os meis cabalus eran tranquilus y se as deseiaban poñel, pero había mús y múas, que eran dificil de ferral y él con Paciencia as ferraba.
Efectivamenti, tiña unha Agencia de o Banco Español de Créditu, que se la Propusierun un tiu mei, Tiu Vicente y otru Tiu Sei, Tiu Tinu, desde os anus 1960, mais o menus.
Tamen queru recordal, que cuandu foi a pia de a Novia, e idel, de Silvestra cuandu eran Novius, foi ei a o sei Conviti, que era en a casa de os Pairis de Silvestra, y que sua Mairi foi amiga de Miña Mairi.
Que descansi en Paz y ei Creu que estará disfrutandu de a Paz de Dios, pues a criau voos fillus y a desaiu voas amistais; ademais tamen era muy amigu de mei cuñau Florencio (q.e.d).
Ayós y que nos encontremus algún día con él en o Ceu.
Soidi a Fala.
Chalrrieira.