San Martín de Trevejo - Caceres

É aproveitáu o tema d’a estatua, que sei fai un-hos días, pa recordal que fai un tempu había u-ha especii de obeliscu o mausoleu en a parti d’aiantri d’a igresia, según se vai p‘a calli o Portu, (chameili cumu queiráis) en recordu d’aquelis mañegus que morreran en as guerras (a toas as guerras calificu de inicuas) de España. Agora mismu nun sé si s’a quitáu o si permaneci alí. Ben digu que, si queremus recordalos que quitin isu, y se faia algu máis dignu. Así o píu a Xunta Municipal que saia d’as urnas en a primaveira.

Se m'an ocurríu estis versus

A ESTATUA

En mutus lugaris contan,
que nosotrus, os manhegus
temus mui poica memoria,
pero temus boos arrestus.

Pero agora en esti foru,
se percibin muvimentus
cumu de fel un-ha estatua,
un-ha talla, un munumentu

Mais a hora de eital mán,
con un problema tropezu
¿dóndi a poemus colocal,
p’a que nos sirva de ejemplu?.

¿A ponhemus en San Xuan,
o en a costa de San Peiru?
¿En as Hortas, en o Forti
o Caminhu d’o Conventu?

Se poi ponhel en a praza,
en Os Chas, o en Os Corceirus.
En a Relva, en a Cachina,
quizá n’o Tesu Galegu.

En As Mallás, en O Dambru,
en A Alfena, en O Cabezu,
En O Barrocu Esparrión,
o caminhu d’os Ferreirus.

Mais un-ha vé que se sepa
ondi diablus a ponhemus,
hemus de consensual,
- poicu me gusta esti verbu -.

con mutivus y con radós
a quen se la concedemus.
Que nun vamus a ponhel
a quin chegui alí primeiru.

¿Un políticu, quizá
p’a valoral o qu’a feitu?
As coiças que resolvei
pensu que van en o sueldu

Poemus poñel alí arriba
a un labraol, a un ferreiru,
a un pastor, a un albañil,
a un-ha muller, a un pequenu.

Un militar, un paráu,
un músicu, un taberneiru
un mecánicu, un artista,
y ¿por qué non? un maestru

Máis ei ben creu que hai que fel
un vistosu munumentu
que nos recordi a os demáis
esis ignotus mañegus

que en mutas inicuas guerras
dexorin vía y sentimentus.
p’a que poamus recordalos
y guardali gran respetu.

En as guerras “de las Galias”
o en a d’o Peloponesu
en a toma de Graná
y hasta en Flandis, en os Tercius

Nun importa en qué lugal
dexorin a vía y o “tempu”.
Si se le rindi homenaji
que sea con mutu respetu.

Esti humildi trovaol
se daría por satisfeitu
qu’as novas autoriáis
y o próximu axuntamentu

quitara ya de un-ha ve
esi munulitu feu
que se encontra tras a igresia
en o absidi do templu.

Nunca foi boa coiça a guerra
pa dirimir os dereitus.
Mais aquelis que morreran
merecin mutu respetu


N.B.

ábside Arq. Parte del templo, abovedada y comúnmente semicircular, que sobresale en la fachada posterior. (Del diccionario de la RAE)


BOAS NOITIS

B.RODAS

"¡Estoi con vos!"

Un abrazu, FONTI NOVA

Muy bo tema esti que nos propon o amigu BRODAS dentru do excelenti poema, cun a gracia que le caracteriza y bromas a parti. Ten toa a radon sobri esti especie de monumentu (si e que se le poi chamal asi) dedicau a tos os mañegus queidus en contiendas i guerras pur a locura humana. Creu que se merecin algu millol que un simpli "mini piruli", "peiruscu" o "supositoriu", cumu mutus o hemus denominau y menus inda, en o sitiu que se le erigì (creu que ya se falò algu fai un tempu sobri o tema en esti foru) A idea de Chitu do cruzi do cuartel me pareci excelenti, que sea ben visibli, o si non , dondi estaba antis pero dedicau a tos. Pa darnus un ejemplu: aqui en Francia hasta en os mais humildis pueblecitus tenin un monumentu dignus de vel y admiral y rindinduli un homenaji por lo menus un-ha ve a o anu, homenaji que en o nosu lugal pareci que cumu si nun so mereceran, dispois de haber dau o mais valiosu que to ser humanu posee, !! A VIA!!

Esperu que os proximus mandatarius d'o nosu lugal o teñan en conta y nun solu se dediquin a poñer "primeiras peiras" (que tamen digu que se necesitan por o ben do pueblu)porque estis nosus antepasaus creu ei que tamen se merecin esa "peira" pero con algu mais de monumentaliai, vistosiai i digniai.


Un saluu p'a to@s os furistas

Soidi a fala

M/E