San Martín de Trevejo - Caceres

Vaia polu que tindis montáu, collós.

É estau fora un tempu, en un sitiu dondi nun tinha internet (ni farta que me feia). Isu m´a sirvíu pa fel otras coisas que paricía que tinha ulviás; porque, queiramus o non, esti cacharru (PC), te absorbi mutu tempu. Te dedicas a paseal por a urilla do mar, (o por otru láu cualquera), que entendu que por ejemplu en Sivilla o en Castilla nun hai playa (vaya, vaya), y a cultival os amigus, a bebel un traguitu de manzanilla (o de cualquel otru cardu), en fin a leel, a escribil.

Bueno pues dispois de volvel a casa me encontru toa esta muvía, que nun sé dondí dirá a paral.

Era ei o que estaba enfáu con o amu, (dueñu, baranda, etc. etc.). Agora veu que tamén os habéis contagiáu.

Pâ que esti bô homi vea que nun estoi tan enfáu con él os poñu estas rimas, que seirán de un-ha conversación informal que tuvi con Salgueiral o día d´a Crú.

Unhas pâ él y otras pâ otru gran retratista: mei parenti INDANUNSE.
Esperu que les gusti y que vos gusti a os demáis.

Intentaré metelas en o otru foru en o que estáis empezando a participar. Esperu que nun me sea difícil.

Soidi a tôs cuantus lean esti foru, registráus o non.

Tamén soidi a fala, que cumu vais vendu, boa falta le fai.
Otru día será pâ as fotógrafas. Veremus que sacamus.

B_RODAS


SALGUEIRAL

Con a cámara paseandu
por as callis d´o lugal,
se poi vel a Salgueiral
os “eventus” retratandu.
A mi me encargó Fernandu
q´un-has rimas le fidera;
y en o tempu que un espera
que le poñan un bô viñu,
agarru pluma y camiñu
y as acabu cumu quera.

Sabemus que un gran dagal
y que ten bô corazón,
que nunca perdi ocasión
de un gran retratu sacal.
Esi fillu de Marcial,
tamén fillu de Silvestra,
sempri nos trai a palestra
fotus que alegran a vista.
O consideru un artista
máis con a zurda que a diestra.

Que expoñel palabras mil,
un-ha imagin didi máis.
Sea un-ha fotu d´os Ameáis
u o pilón d´o Chafaril.
Y de maneira sutil:
Xalgueiral, furista amigu,
con estas rimas te digu:
¡Sigui fendu esis retratus
que nos fain pasal bôs ratus!
¡Jesús!: “contamus contigu”!.


INDANUNSE

Indanunse cumu fel o sonetu,
que queru dedical a un bô furista.
Con fotus, en o bar: sempris artista
y por isu tendrá tô mei respetu.

Preguntu, sin metelmi en un apretu
- ¿É millol taberneiru o retratista?
Hai coisas que se ven a simpli vista:
millol dagal: de Nicomedis netu.

O pois vel con a cámara en a man,
por Os Balis, por o Forti por San Xuán;
sempris dispostu a fel un bô retratu,

d´un dagal, d´un campitu, d´un-ha calli,
d´un paisaxi do nosu lindu valli.
Nos o insina y pasamus un bô ratu.

P. D. (Post data)

Se eita de menus, en esti foru o en o otru, a otru gran retratista, que nos deleitaba con suas afotus: a otru parenti mei J. L. ¿Dondi te metis?

Brodas, maxistral; décimas, sonetus, cuertetus.....tardas en aparecel peru cuandu aparecis nos queas con a boca aberta. Tu tes que tel algun trucu, esis retirus son propius de grandis artistas. Ei o intentí, me foi unhos días a o Monasteriu de Lluc, peru ná, dondi nun hay mata nun sai patata.
Ei tamen me preguntu ¿Que foi de J.L.?.
¿Y Fonti Nova?
Tamen hemus de dali as gracias a Mye, O Saltu........y a tos os que de unha forma u otra, participan en o forus y nus fain sintilnus comu si estuberamus en a plaza do lugal.
Forti abrazu.

Mutas gracias Cerrumicli, se agradecin as tuas palabras, y desde logu que sempris que encontru y teñu algu pa compartir con os ausentis, aquí me tendréis. Un saludu pa Maruja y pa tí, deseando que estéis ben.
Y pa tos y pa fala igualmenti, muta soidi.

mye

Vai pa os retratistas ....y ei añadu y pa delicia de tos ¿Ves? As ausencias train esas parías de tan boa acullia. Tiu Secretariu, como ei le cahamaba a tei tiu Crisostomu idia, tos os peseteirus son muis listus, el o era, desde logu, tu ago, ademais, ca ve te nos mostras como un recuñuciu poeta, non un sumaol de versus que riman, por que tenin espiritu esis versus. Asi que nun deisis de deleitarnus de ve e cuandu, como o as feitu con paisarus y sitius dos campus do lugal. Por certu, a vel si esti verán te subis un poicu pa o Oesti que teñu unha sucursal da pichorra por ali cerca, ya que cuandu voy a o lugal me sprovisionu y cerca do mar o nosu viñu gaña. Soidi pa tos, registraus y non registraus, aunque, e millol registralsi por que asi cuandu se didi algún improperiu que nos faya saltal sepamus a quen recriminal. Soidi a fala, Un saluu de Chitu.

Estimaus amigus Salgueiral y Indanunse:
Mutas gracias pol os "retratus" que nos poñeis en este Foru. De elis sabemos de as Festas de o Lugal, en esti casu de a nosa Crú Bindita. Tamen dali as gracias a o Saltu que puyu algun Retratu.
Tamen queru felicital a nosu Poeta y amigu Brodas, por fel as dedicatorias en Poesía a Salgueiral.
Ya que sabemos quin e Salgueiral, queru ideli, que ei foi a o Banquete de seis Pairis (Marcial y Silvestra), cuandu se anunciorin que quirian casarsi, cuandu vivian en casa de seis Agüelus. Mais tardi sei Pairi Marcial, me ferró mutas vedis os cabalus de mei Pairi (q.e.d).
Toos son bos recordus de haber viviu en o nosu Lugal, que nos vei nacel y crecel y que logu tuvemus que separarnus de él pol circunstancias de a via. Oixi contemplamus o Lugal desde Lonyi, gracias a Cámara. Ei concretamenti toas as mañás desde Mairil.
Soidi a Fala.
Chalrrieira.