San Martín de Trevejo - Caceres

HABRÁ QUE TEL PAZENCIA

Pasó o tempu de Roma.
-de corazón vos digu-
Ya falaban aquelis habitantis
un-ha especii de idioma
desde o godu Rodrigu.
Alguh-nos os trataban de ignorantis
a esis homis de antis
que falaban ”mañegu”.
Agora os estudiosus nun se aclaran
a mutus la pareci coiça rara;
nos tratan de metel en o galegu:
HABRÁ QUE TEL PAZENCIA
y padecel algún-ha impertinencia

Pregunta muta xenti
que ven por o lugal:
"¿cúmu ha puíu chegal a nossus días?"
Y encontras un "valenti"
que se atrevi a "falal",
sobre tó con un vasu a meiudía.
Y con muta osadía
y niñún fundamentu
"da crasis" sobre o origin d’o mañegu.
Y pensas: "esti está de viñu cegu",
"en “a pichorra” o vi fai un momentu"
HABRÁ QUE TEL PAZENCIA
que sempris aparecin "eminencias".

D’os moirus y romanus
solamenti se sabi
que dexorin mui poicu por a villa.
¿Serán os asturianus
os que nos den a clabi
de conserval tamaña maravilla?
A coiça é máis sencilla:
hay que tel humildai
que algun-hos que presumin de intelectu
se proclaman os amus d’o dialectu,
y hasta dueñus – quizá – d’a Calli a Ciai.
HABRÁ QUE TEL PAZENCIA,
porque os hay que carecin de prudencia.

Os políticus venin
a sacal un proveitu,
con "a fala" o galegu y otras danzas.
¡Cara dura que tenin!
¡con o poicu qu’an feitu!.
Sólu venin buscando as alabanzas
tamén a enchel a panza
con a fruta maúra.
¡O mañegu está vivu y nun se morri
con boa soidi h’aguantau cumu un-ha torri
repúblicas, reinaus y dictaúras.
HABRÁ QUE TEL PAZENCIA
p’a aguantal improperius e indecencias.

Ei tamén tuvi agüelu
que contaba relatus
y contus por a noiti n`o serán.
Me sirví de modelu;
disfrutí mutus ratus,
y busquí seis recordus n’o desván.
Y p’a toos cuantus van
soberbius y arrogantis,
presumindu de mañegus ilustraus,
les recordu que sólu habrán lograu
q’os recordin cumu un-hos ignorantis.
HABRÁ QUE TEL PAZENCIA
y tomalo cumu un-ha pinitencia.

Dedicau a toos aquelis que, con maiol o menol resultau, tratan de conserval a lengua que hereorin d’os pairis, dos agüelus.

A toos os que agora tratan de fel un-ha coiça que nun se fidu antis caxi nunca: escribil en mañegu. Sabemus que NOSSA lengua, ha síu un-ha lengua oral, que poicas vedis se ha escritu. Y a tratan de escribil; con castellanismus, con galicismus, o anglicismus, cumu ben didi Chenchu, a quin desd’aquí le agradezu too cuantu ha feitu en a miña defensa. Nun te preocupis Chenchu, que nun hai piol cuña qu’a da misma maira.

Y p’a esi tan “ilustrau”, que consideru que é un-ha sola persoa (¡que listu Chitu!), y por a edai que ei le calculu, nin ten netus nin ya ten agüelu, nun le puían faltal estas coplas flamencas, afición que me queó (ademáis de un fillu), d’a miña estancia en terras de María Santísima.

Me sobran conversaciones
con gente de tu ralea
no me des pares y nones
que aunque te vistas de seda
te noto las intenciones
(Fandangos de Perla de Cádiz)



¿Cómo quieres comparar
un charco con una fuente?
Sale el Sol y seca el charco,
y la fuente prevalece.
(Soleares del Lebrijano)

y aunque ei nun soi Cancheira (a quin le deseu un-ha recuperación), si poiu aplicalmi aquela taranta que didi máis o menus así:

Soy piedra que a la terrera
cualquiera me arroja al verme,
parezco escombro por fuera;
pero en llegando a romperme
doy un metal de primera
(Taranta de Manuel Escacena)

VOS DESEU A TOOS MUTA SORTI.