San Martín de Trevejo - Caceres

Amigu Chitu:

Cumu dixu J.L. otru día, te consideru amigu, solu por as vedis que nos leemus en esti foru, aunque teñu fundás sospecha de quin creu que eris. Creu que o tema d'as salvas te delató. Pero isu agora nun é o asuntu que nos preocupa, si non a desgana que se ve en o foru.

Veu que te preocupas de o Foru. Tamés ei creu que mutus estamus de retiru y penitencia en a Cuaresma.

En esi retiru a o que me refieru se me han ocurríu un-hos versus sobre un-ha historia que me contorin. Ignoru si é real, o si, con o transcurril d'o tempu, se ha díu aumentandu.

Os versus, y a historia son estis:


A CHAQUETA

M’han ditu que baxaba camiñandu
despacito tras a caballiría
quentaba o Sol, porque era meiudía
a chaqueta ya le diba estorbandu.

En suas coiças vindría cavilandu
y en o solu se encontra, alí pirdía
un-ha chaqueta, que pon insiguía
sobre a carga que había estau colocando

A chaqueta se cai tras un momentu
cuandu a faca se pega un tropezón
y aquel homi con gran satisfacción
a coloca en a carga, tan contentu.

Varias vedis se le quei a chaqueta,
y a diba “recollendu” sin paral
a última, muy cerca d’o lugal
nun a quixu y a tiró p’a un-ha cuneta

Mentras metin a leña p’o lumbral
a muller nun encontra esa chaqueta
a buscan entre os troncus y a malleta,
esi casu ya empeza a cheiral mal.

Ve a muller con as más en o cuairil:
- Nun te apuris – le didi tras un ratu –
En a carga treya tres o cuatru,
a última a tirí p’o Chafaril

Cumu m’o contó mei primu, vos o contu. Me dixu o nomi d’o protagonista, pero agora nun m’acordu.

Vos deseu muta soidi y muta sorti.

BRODAS


P. D.

Sobre a escombreira d'o cementeriu nun m'acabu de enteirar dondi é exactamenti: ¿en a viña de Javier?

Ya morrei o bo omi, creu que e o mismu que levandu a vaca atá con unha corda (coisa rara pero el diba po campu así y le falaba a vaca), o animal sa quitó pa pacel en unha cuneta y él chegó con a corda colgá do hombru solu pa as alfenas. Me gustorin os versus, os guardaré con o mismu afectu que te teñu.......Ya sairás da duda home, que en as salvas habia muta genti...en o verán... Un saluu de CHITU

Bueno, bueno, Brodas, ei tamen te poyu eidil que "nun se cumu tas arreglas" pa sacal en versu, hasta os contus y leyendas do lugal; èsta se la uivì contal mutas vedis a mei parenti Nista, que a maneira que tiña de contalo, sempris era un-ha pazaà de riil, nun se si habras tardau "un mes" en preparalo , pero te ha seidu "olé" "chapeau" , asi que ya pois dir preparandu otra, que pa isu eris "homi de letras", porque si non, ya ves, nos entra murriña y hasta o foru se durmi.


Un abrazu y soidi pa tos/as os furistas, y hoixi en especial p'a nosu amigu Cancheira, p'a que prontu se encontri en caxa recuperau deyantri de esti aparatu, esribindu as maravillas que èl sabi fel.

Hola Brodas!.¿Comu vay esa via?.Esta historia da chaqueta,nun é a primeira ve, que uivi falal de ela estandu en o lugal.
Por certu!,está muy poicu tergiversá.A has contau,tal cual,se comentaba entoncis.
Igual que tú,nun se,si e verdadeira o nón.Pero nun deixa de sel muy curioxa.Pusiblimenti haya siu verdai,ya sabis o tozudus que erán antis os homis.
Nun se si sabrás:aquél que se desplazaba hasta Payu, solamenti pa compral tabacu, y le idia a mullel: home!,ya que vas a Payu,traimi fariña.Y el le contestaba: non!,ey voy a o que voy,y non voy a por fariña.Y o tiu, se daba a volta, solamenti con o tabacu.!Manda collos!!.
Bueno!,ya veu que tamén andas detrás de Chitu.Somus comu a mitológica constelación de "Orión",eternamenti persiguindu a "Táuru", y sin poelo cazal.
Habel que pasa con estis peredoxus furistas.Istu é comu en a clásica Roma,a diariu se reunian en a praza, pa cambial imprexios.
Soidi...

Exactamenti Fontinova II, isu é, acordati que nosotrus nos reuniamus, fai,mutu claro, en os portais, en o llanu igleisa, en a ermita de San Peiru, según a época. Esti e o sintiu do foru, sobre to, a comunicación, o contrasti de pareceris, a critica constructiva o nun tantu, en fin, ¡hay que falal!. ¿Que pasa con esis escombrus tan feus que didin que hay dondi didi Brodas? ¿Siguin en o mismu sitiu? o son pa compactal o terrenu. Contei algu sobre o tema. Vos salua,( quin solu escribi con un nomi, que hay quen o fai con mas de un). Chitu