San Martín de Trevejo - Caceres

P'a toos aquelis, cumu Fontinova dois, y otrus máis que naceran en o lugal alá por os anus 40 y tamén os 50, y tamén p'a MACAMA, que se declara mutu máis nova que nosotrus, estis pequenus versus, y que me perdoi M/E, por habelos acabau antis d'o que él quiría.

RECORDUS Y AÑORANZAS

- Dimi Jacintu ¿t’acordas
d’aquelis tempus de antis?
- Claro que m’acordu Ángil,
Esis tempus ya se foran.

Tamén m’acordu Jacintu
do carritu de tíu Xuán
do fornu de tíu Román
y hasta dos cochis d’Alipiu.

D’o ponti d’o Chafaril
do lagal d’o Buticariu
da cana de Don Eduardu
y dos calus de tíu Gil.

M’acordu con gran cariñu
das gaseosas de Agustín
tíu Mateu y o tamburil
das pichorras y do viñu.

Me acordu con gran afán
d’esa escuela dos cagós,
a dondi díbamus tos
agarreitus por a man.

Y chovendu sin paral
díbamus, en tos os Santus,
entre responsus y cantus,
a o cementeriu a redal.

De tiu Luis machandu ferru
d’a escuela de don Ciprianu
dos partíus en o Llanu
d’a taberna d’o Biderru.

D’aquelis homis mayoris
o miserere cantandu,
y as mulleris camiñandu
tras a Virgin d’os Dolores.

M’acordu d’o pozu Viga
dos paseus n’a carreteira,
sentaus en alguna peira
esperandu algun-ha amiga.

- Ángil, m’acordu muy ben
do camiñu d’a Pastora
y tamén m’acordu agora
d’as capeas de Vilamel.

M’acordu cuandu nevaba
y nun díbamus a escuela
y de cuandu nosa agüela
a sua casa nos cunviaba.

D’o cini de Marcilinu,
de tiu Pempu con pelexus,
tia Damiana con os quexus,
d’a poixá de tíu Faustinu.

De tiu Sindu, o carpinteiru,
de tíu Ángil o Ferreiru,
d’o directu y de Gorrón;
m’acordu cuandu en San Peiru
se puía ýugal a o balón.

M’acordu de aquelis ratus
pasaus en casa “dos Gatus”
y d’a caseta da lú;
y d’o comerciu d’os Chatus
y do mecu: don Jesús.

Cuandu díbamus a níus,
por lugaris tan quiríus
d’os que temus añoranzas,
y d’os cheirus d’as matanzas,
d’as aguas d’aquelis ríus.

Y m’acordu d’habel díu
con mei pairi p’Os Baldíus
a fel algu de picón;
y a apañal con mutu fríu
y habel queidu p’o pilón.

Y se me ven a memoria
cuandu chegaba de Coria,
a disfrutal d’o verán,
y de comel p’a San Xuán
figus que sabían a gloria.

- Nun sigas Ángil, por Dios
esis tempus recordandu,
que acabaremus chorandu
a lágrima viva tós.

Y siguindu esti consellu,
antis de chegal a vellu,
dexu de contar historias.
Sempris teñu n’a memoria
a San Martín de Trevellu.

BRODAS

P. D.

Isu é d'o que ei m'acordu. A memoria é floxa, pur isu, mutas coiças se me han queau p´'atrás. Cumu os biscochus de tía Ricarda, y máis. Si algún se acorda de otras q'uo diga, y veremus a fel algu.

BOAS TARDIS O DUMINGU POR a TARDI.

¡¡Amigu Brodas!!.Alguin en algunha parti,debi de estal muy orgulloxu de ti.
Soidi...

boas tardis a tos.
vaya que soi mais jovin que vos, pos soi do 60.
peru a mutus dos que nombras ,os coñozu ed ulvil
amiña aguela cuandu ei era pequena.
o a miña mairi.me gusta leel coiças do lugal y de as
gentis. un salu pa tos.

Ca ve me sorprendis mais. ¡Memorion! hay coisas, en as que nun habia queidu pero ¡ Son ta entrañablis toas! que esi recordu que nos fais chegal en versu, e unha espici de memoria común,digna de agradecimentu, por isu ¡gracias!. Se nos poi tildar de algu vellus ya, de mayoris millol, y, sin querel sel ejemplu pa niñun dos que venin detras, esis, os que venin detras, tenin, con estas coisas, material de apredizaji, que de to se poi aprendel. Os que nacemus en os cuarenta, temus mutu que contal y mutu que idel inda.Asi que hay que siguil por que sin nun hubera recordus e como si nun existíramus. Un abrazu. Chitu

Ya que nun sabemus quin eris tú, sí nos gustaría saber quin era tua agüela, o tua mairi, as que citas en o escritu. Por lo menus, por dondi vivían. Así nos vamus entretendu, y tratandu de averigual coiças.
Soidi.

BRODAS

Bueno, parenti: Ya nun se que eidir, agora mismu estoy cunha boca aberta y a menti tan lonxi, que ya nun se ni dondi estoy, en unhos momentus e voltu a vivir tos aquelis anus con suas yentis y to. E chamau a muller, o fillu y asta os vidiñus francesis que nun se han enteirau nà de nà, pero ei me e queau agustu.
Y didis que tes a memoria froixa? "UN MEMORION"

Y ei que ya estaba reignau a esperal hata o fin de mes.

(falandu despacitu), ei creu que tu ya has tes preaparàs y nos ques impaciental, a que si? nun te preocupis que ei nun se lo dirè a naidi.

Te felicitu

Un abrazu, y soidi

M/E