San Martín de Trevejo - Caceres

Cheiran a leiti, a montunas,
tufus de machus cabríus,
comeran herba,en o ríu,
y ya,alumbránduli a luna
han triturau adeitunas
negras,que queyan, mauras,
desdi a rama,desdi a altura
que logu a vara varea,
!!que cara tenin mais fea...!!
!!y que mirá tan oscura...!!


Chegan a o lugal,saltandu,
por as callis, tan estreitas,
venin correndu, dereitas,
buscandu as boigas,balandu,
algunhas, balan chorandu,
y os machus, que van primeirus,
topan con os compañeirus.
Entran a boiga empurriandu,
xuntas,muy xuntas,son bandus
de "palomas" y "luceirus".

Os dagais y as dagalitas
le van contandu a sua mairi
que ya está en a boiga pairi
con o perru y as cabritas,
y ela saca unha marmita
chea de leiti,migá,
está bastanti cansá
y sentá, en o escanu, pensa
si habrá, inda, en a despensa
viñu,pan y tomatá,

Abaxiu, en a boiga, chora
unha cabra, y ronca o perru,
y en otra boiga,un biderru,
cuandu o reló da a hora,
vai cunfundindu en a aurora
os mugius y os lamentus.
En a cassa hay sentimentus
homi y mullel que se entregan
mentras d´abaxiu le chegan
cheirus a cabra y alientus.

Muy boa, CANCHEIRA. Ensiguia me ha vindu esi cheiru tan particular das cabras cuandu pasaban pur a calli a Ciai cuande ei era pequenu.

Dispois e muy entrañabli y adecua pa estas fechas ( pareci un contu de naviais) solu te ha faltau poñel a nevi.

Ben se te puiria nombral : GRAN POETA MAÑEGU porque as fais bordàs, y en mañegu tenin dobli valor.

Un saluu y BOAS FESTAS.

¡¡Enhorabuena, Cancheira!!."MUY BOA".
Soidi.....