San Martín de Trevejo - Caceres

Dispois d’o debati sobre o aparcamentu n’a praza se m’a ocurríu esti romanci.
Son unhas especies de coplas de cegus, con rimas asonantis en versus paris. Aquí si que poemus falal de versificaol o poetastru. Nun siría capá de fel ni siquera algu pariciu as boas puisías con que nos deleita Cancheira.
Didin asina:

ROMANCI A PRAZA.

Que follón hemus liau,
con a praza d’o lugal
unhos a querin sin cochis
otrus querin aparcal

Y por cuatro o cincu cochis
nun nos vamus a pelear
pero siría conveninti
que nos dexaran pasal

Antiguamenti era a praza
o corazón d´o lugal:
o ayuntamentu, as escuelas
¡hasta se diba a bailal!

Y se puñían os cubetus
que se tiñan que laval
pa logu metel o viñu
y poelo trasegal

Os homis diban de compras
si a praza estaba nevá
evitando que as mulleris
se foran a resbalar.

A barricós se xugaba
en as tardis do verán
y quin pur alí pasara
se levaba unha calá.

Os macetós y as cadeas
hay que vel o mal que están
son tan feus y tan rarus
qu’os tendremos que quital.

Y menus mal que a o pilón
han sabíu respetal
porque d’a Torri quitorin
xustu a mitad d’a portá.

Esti romanci se ha feitu sin ánimu de molestala naidi. Son simples ironías o sarcasmus.
Dispois de felo me he acordau que fai un tempu Chitu me dixu que me animara con a letra de unhas sevillanas. Te dirè Chitu que as Sevillanas, dentro d’o flamencu, é un canti menor, festeiru. A mi me gustan máis unhas trilleras, un canti por soleá o por siguiriyas. Isu é máis profundu, comprendendu que ten que habel gustus p’a tó.
Con a letra de esti romanci se puían cantal unhas sevillanas.
A música poía sel a que tenini estas opciós:
a.- Sevillanas de los Amigos de Ginés: “Algo se muere en el alma…”
b.- Sevillanas Romeros de la Puebla: “El embarque de ganao, levanta una polvarea…”
c.- “Carretero, carretero, no le des prisa a los bueyes;… de Bordon 4.
d.- O que un furista se atreva a poñeli música.

P’a que resultaran completas hay que añadil dispois de c’a duas cuartetas esti estribillo:

Señor alcardi queremus,
por a plaza puel passal,
tantu si vamus o O Forti
o tiramus p’a San Xuan.

O esti otru

Queru passal por a praza
p'a visital o lugal
p’a piel dil a calli O Portu
y tamén a calli a Ciai.

Bueno ya está ben por oixi.

Asustau estoy, !leitis¡
y ei sin enteiralmi,
aunque de investigaol me eitin
xuru que he de velgalmi...

Si me huberas dau esa pista,
ya te hubera localizau
y ya hubera descifrau
quin eris, !! Un artista ¡¡
y me te ca ve mais asonbrau.
Sigu sin sabel quin eres, peru aunque me queé sin mublis en a oficina, seguiré en o cassu.

Tiu José o Porras idia "Siento una hemorragia de satisfacción y me mullo en los colchones del agradecimiento..".Agó e un bo momentu pa recordalo y fel bo o que idia.
Sintu satisfacción por as consideraciós que fais sobri miña persoa y agradecimentu por ési romanci que e a expresión de un problema do lugal y un deseu que ei compartu.Te felicitu porque,aun sabendu que nun te has empleau muy a fondu as expresau en versu ideas que dexian algu(volvu a León Filipi).Algu nos ha queau.Estéticamenti tos sabemus que o romanci e unha forma sincilla de fel poesia popular...Muy ben BRODAS,ya teñu compañeiru.
Si has vindu a Jerez y nun m´as chamau o me has citau en cualquel lugal e algu que teñu que lamental.Un "mañegu" nun le fai isu a otro "mañegu".Si has vindu a por unha ferramenta a Leroy Merlín,e que nun andas lonxi d´aquí....si te gusta o flamencu y coñocis a taberna flamenca de Jeréz mañan vay por tí.Un brazu esperandu que otra vez me chamis o me digas dondi te veu,y sigui con romancis y versus,pero te volvu a idil,!!BRODAS,nun me odas!!.

Te felicitu,Brodas,.. me ha encantau.... .que ben se esta poñendu esti foru,ca ve me gusta mais,
Pa tos un abrazu
Boas noitis

Estoy...que nun se como estoy. Acabu de quealmi con a boca aberta. Ami, me gusta uivil sevillanas, de ve en cuandu, y o idia por si andas por esas terras de Maria Santisima, pero aunque nu andis po ei se te a pegau...tela (como didin os andaludis). Ago si que ya nun teñu ni idea de quin poi sel oamigu Brodas, que, sendu do lugal, tantu sabi de flamencu - ei na de na,aunque me gusta-.Teñu que felicitalti por a forma de expoñel as coisas. Deseu que no descubramus cuandu chegui o verán. ¡Que digu, que sepamus quen somus ca ún ! por que coñocel, a verdai e que nos estamus coñocendu, mutus de nosotrus, ago, ya que cuandu nos vemus en o Lugal, o fora de él, falamus de vanaliais y ago, nos escribimus sin sabel quin somus algunhos, y aquí, nos mostramus tal como realmenti somus, creu ei, y a verdai e que, por lo menus quin istu escrib, esta descubrindu unas caliais humanas impresionantis que non cuñucia, a pesal de que, com he ditu, seguru que coñocemus ya.

Un abrazu pa tos y sigy alegrandumi de haber descubertu esti foru. Chitu

BRODAS: me alegra uivilti (leelti) por o tempu que nun nos tratamus tan cerca.
Estoy en o lugal y he vistu que o da plaza e piol o remeyu que a enfermeai. Si ponin os macetós y as cadeas p'a que nun aparquin oiyi había cuatru cochis aparcaus das cadeas p'a fora y otru a o lau da señal de dirección pruhibía. ¡Enfrenti do ayuntamentu! Oiyi me he dau conta de que si a plaza didi algu do lugal pa os que venin de fora nu se poi tapal ni con cochis ni con macetós y cadeas, ¡fora to isu! Que se vea a plaza toa y que se poia pasal. E ben facil. Temus que deisal que a genti vea a plaza. Un abrazu, BRODAS, que tú si sabis quín soy.

He ditu que estoy en o lugal y p'a algunhos isu poy sel mutivo de envidia (sana, claru está). Hay poica yenti y fai mutu fríu, tendu en conta o airi o y ceu despejau. Pero se está muy ben adurmilanduti en a sesta a o sol que te entra por as ventás y disfrutandu das postas de sol con unas cuantas nubis y con o airi, sempris o airi do lugal.
Desde o lugal, desde San Martín, soidi pa tos.