San Martín de Trevejo - Caceres

He vistu a cuestión d´a canción, que si Abba, que si Beta, que si mairis y pairis.
Se me han ocurríu estas décimas, que, dedicu, de corazón a Chitu y a Filisa, que, creu, se ha jubiláu d´o insinu.


MONDAY, MONDAY

Monday, Monday entonaba
con bo ritmu y melodía;
sua güela y sua tía María
embelesás escutaban.
Mais sei primu, que sesteaba
nun tinha a misma opinión,
- Pensu que nun é ocasión
de “mondar” agó uliveiras –
¡Vaiti ya p´a carreteira
con a “dichosa” canción!

Máis arriba tíu Segundu
que, sabis, era vidiñu,
le preguntaba a o subriñu
por aquel cantar tan fundu.
- Hoxi en día meiu mundu
tararea esti cantal.
Está cantandu o dagal
de Beneditu y Albina,
o netu de tia Antulina,
que vivi en esi lumbral -.

En a nosa adolescencia
mutas máis “coplas” cantó;
algun-has s´has inventó
otras cantó sin “licencia”,
Sempris hubu un-ha presencia
que a cantal o estimulaba;
anus dispois se casaba
y se diba p´a Sevilla,
con Filisa: maravilla,
un-ha familia fundaba.

Agó que ya penda canas,
porque os anus han pasáu;
agó que l´han regaláu
un-ha guitarra galana;
tendrá que cantali nanas
a neta que o ten “tuntitu”.
Escuta ben: Angelitu,
temus que dil a pichorra,
a bebel vinhu de gorra
y a cantar os “clavelitus”.

De corazón, sabéis que se vos quel y se vos aprecia. Forti apertón de mâs.

B_RODAS

Encendel o ordenaol por a mañan pa eital o vistadu de rigor, y encontralsi con que un bo amigu da infancia, le dedica a ún unhos versus con a chispa y gracia , pegá de paquí abaisu dispois de tantus anus en esta terra, das que o autor fai gala en tantus otrus, e, sin duda, tan gratificanti, que nun se poi deisal de agradecelos con o mismu afectu sincero con o que se fai a dedicatoria. Gracias Brodas y un abrazu pa ti y pa a que ha tiu a paciencia de aguantalti, tamen de parti de a que ten a paciencia de aguantalmi a mi, y ago inda mais con a tabarra da guitarra. Esperu que estas Naviais poas dalti un paseu por o lugal, ya que nunca se te ocurri fel escala en Sevilla, y sí que nos tomaremus, con toa a aligria do mundu, esis vasus en a Pachorra.Guardaré os versus pa cuandu a “minina” sepa lel, por lo menus. Un Saluu pa tos.Aupa a Fala .Chitu