San Martín de Trevejo - Caceres

Estas son as definiciós, según o diccionariu d´a R.A.E.

Paisaje: Extensión de terreno que se ve desde un sitio, considerada en su aspecto artístico.
Paraje: Lugar, sitio.
Personaje: Persona de distinción, calidad o representación.
Paisanaje: Conjunto de paisanos. Circunstancia de ser de un mismo país dos o más personas.

Partindu de isu se m´han ocurríu estas rimas, emulandu as de pê quebráu, que fidera aquel Jorge Manrique, em memoria de sei pairi.
Sin ánimu de polémica, ni siquera de imitación aei van:

Paisaxis, Paraxis, Personaxis, Paisanaxi.


Desde sempris m´encantorin
as coplas de pé quebráu
manriqueñas.
Nun queru entrar si as copiorin,
si has fidu un chinu de láu,
o por señas.

Recordu que, de pequenu,
ei as puía recital
de memoria.
Agô ia nun chegu a o plenu,
cumu cuandu era dagal,
alí en Coria.

O Manriqui as dedicó,
cuandu a Pârca a chamal vinhu
a sei velhhu.
Éstas has escribu agô,
con coisas de San Martinhu
de Trevelhu.

Alá en a Serra de Gata,
alí en o fundu d´un valli,
descansandu,
se encontra esi “níu de prata”,
con arroyus por a calli
refrescandu.

Si procedis de Castilla,
por O Soitu vas baxiandu,
para y mira:
tô que ves é maravilla;
airi bô, si ves andandu
se respira.

Y si ves desde Valverdi,
desde Os Foius o Cileirus,
pois notal
cúmu está o campu de verdi
cúmu te venin os cheirus
d´o ulival.

Si por “As Cumbris” asomas,
vindu desde Vilamel,
te entran ganas
de volal cumu paloma,
y desde o airi poel vel
filigranas.

Que vaias por dondi vaias,
por o campu o por a villa,
tú verás,
que aunque nun teñamus playa;
de ver tanta maravilla
godarás.

Si por a praza paseas,
observas o campanariu
señorial.
Tamén ves un-has cadeas,
que mutus creen necesariu
retiral.

Esi campanariu aisláu,
que se eleva muy altivu
impresionanti,
d´a igrexia está separáu,
cual si fora fugitivu
y arroganti.

Y tamén é extraordinariu,
tempranu, por a mañán,
(coisa rara),
dil detras d´o campanariu,
pa contemplal a “ventán
de Barara”.

Y si vas a parti alta,
t´encontras a calli a Ciai
con as peiras;
poicu pois eital en falta,
quizá certa caliái
de escaleiras.

Alí por a calli a Ciai,
tinha a pichorra tíu Luis
“o ferreiru”.
Agô a tenin os dagáis,
os que vivin en París,
n´o extranxeiru.

Esas casas con balcôs,
que encontras en o lugal,
con adobis
Esas casas con tozôs,
dondi te pois refugial
cuandu chovi

Y si te das un paseu
por as callis empeirás,
vai con cuáu.
Te pois encontral, ei creu,
si miras as enramás,
mareau.

Me puía tirar un bô ratu
Y cen versus escribil
d´O Conventu;
d´o estancu de Liberatu,
d´a taberna de tíu Gil
tan contentu.

D´o Adibral o d´A Cachina,
O Serrubiu o d´o Encanáu,
d´os Curráis;
d´Asomanti o d´A Charrina,
quizá d´o Toiru Peláu,
d´os Ameáis.

D´os Quintus o d´As Mallás,
d´a Sirrita o de Poialis,
d´o Arrasaiu,
d´a Rucinega o d´Os Chás,
d´a Sardiñeira o d´Os Balis,
o d´O Gaiu.

D´as Torris o d´O´Vallitu,
d´a Leira o Fonti Tacón,
d´Os Corceirus.
Fonti d´Os Chafarilitus,
o d´o Barrocu Esparrión,
d´Os Ferreirus.

Y si estás impresionáu
de ver tan lindu paixaxi
singular;
te pois queal desconcertáu,
con feitus d´o paisanaxi
d´o lugal.

De tíu Faustinu “o ferreiru”,
d´a fragua de tíu José:
coisas mutas.
De tíu Alfonsu en o mateiru,
de tíu Xiuan Paíno “jué”;
si me escutas.

D´o arcardi “tíu Beneditu”,
Crisóstumu secretariu,
tía Binita.
Máis coisas que nun te he ditu:
don Ángil o Buticariu;
Margarita.

D´a que feia aquelas tartas
y vivía por San Xiuán,
por o norti;
d´o que nos levaba as cartas,
d´o fornu de tíu Román,
en O Forti.

D´O Conventu ves subindu:
p´alí p´O Forti vivía
tíu Fortoxu,
y tamén tiña tíu Sindu
taller de carpintería,
primorosu.

De Cherepi o carniceiru,
y d´o meu que nos mitía
con cutelus;
y de Colás o albardeiru
tamén d´a carpintiría
de mei güelu.

D´o que tiró sua chaqueta,
d´o cura y os monacillus
en o coru.
D´o que se le ulvió a malleta,
y de aquelis chascarrillus
de Teodoru.

D´os homis en procesión,
cumu émulus de Silus,
entonandu:
tíu Luis con a ronca vó,
Teófilu, tíu Camilu,
tíu Fernandu.

¿Quin era aquel ferraol,
que en a Costa de San Peiru
traballaba?
¿Y quin era aquel señol,
que, por callis, con sombreiru
se paseaba?

Un día en o campu hubu un homi,
que sua merenda cambió,
por cigarrus.
Didin que pasó tal fomi,
que por a tardi zampó
meiu guarru.

Y si o tempu estaba en agua,
o si o trigu estaba verdi,
se xiuntaban
en talleris o en a fragua…
(ferramenta que se perdi),
y chalrreaban.

De mutus mañegus máis
puíamus estal redactandu
meiu anu.
Homis, mulleris, dagáis,
que se nos han díu ulviandu
tan tempranu.

Puía falal d´os lagareirus,
d´os que diban a apañal
d´os pastoris.
Poiu escribil d´os cesteirus
d´as que diban a laval
d´os señoris.

Hay tamén otrus paixajis
que se nos habrán pasáu
sin cital.
Tamén algún personaxi,
se nos ten que habel ulviáu
recordal.

Tô que te puamos idil
pensarás que puera sel
localismu.
Nun te quixiera aburril
millol que o venhas a vel
por ti mismu.

Agô que mutus de vosotrus vos habéis incorporáu a os trabalhus, sólu vos queru dedical istu, y desealbus que nun tenháis (¡qué coisas!) o síndrome postvacacional.

Boas tardis a tôs.
Soidi a fala, (que boa falta le fai).

B_RODAS

¡Bravo Brodas, bordás¡

Muy bien Brodas,!que recuerdos!,sigue asi..

¿Que se poi idel? Se quea un sin palabras, de verdai. Pois estal satisfeitu, que estas coplas debin queal pa inmortalizal a o lugal y pa inmortalizalti a ti, sei autor, que esi tal Mariqui, te enviadiaria si hubera cuñuciu a o lugal y as xentis y o que citas do nosu lugal.Enhorabuena quintu. Un saluu pa tos y soidi a fala.Chitu

Simplemente me quito el sombrero.Un saludo.

Estimau Brodas:
realmenti he envidiabli a faciliai que insinas con o maneju das formas y cómu fais rimal as palabras utilizando a Fala.
Primeriru que debis coñocel muy ben, comu digu, tos esis lugaris y a xenti que nombras en a tua puisia y segundu peru nun en memol gradu se nota que aunque fora siguis itandu mutu, pero mutu, de menus a o lugal y as suas coixas
Filiciais, paisanu.
Enhoraboa por os teis versus.
Y si, soidi, muta soidi pa tos os que escribis aqui en o foru y tamen pa os que nun o fain y son da familia mañega. estis pur desgracia se perdin cixas comu estas de Brodas, pero qué le vamus a fel.
Soidi a Fala

Mui ben Brodas.
Se poi idel que num t'ha queau tinta no tinteiru, que repasu tan bô.
Forti abradu.

Me unu a tos os que te han felicitau por ese bo traballu que as feitu ,ya se ve que recordas ben o pueblu y os paisajis.Ese ferraol que treballaba en acosta de San Peiru puera ser ei o fillu.Un saludo y un abrazu amigu Brodas y que mutas vedis nos deleitis con esas rimas tan boas.
El Salto

É agradabli,vel comu os amigus i amigas do foru están de novu ena brecha.

O milhol de to, i o máis importanti, ha síu comprobal comu tós habeis chegau "gracias a Dios",sanus i salvus a caxa.

¡¡Brodas,collós!! -vaya entrá!!!-.

Forti abrazu a tós

FONTI NOVA

Boas mañás teñan as Mañegas y os Mañegus:
Ei tamen queru felicital a nosu amigu "Brodas", que pinta, dibuja y engrana as poesías con un recital "mañegu", que nos fai sintil encantaus.
Enhoraboa y que nos sigas deleitandu con a tua inteligencia y acertu mutus anus.
Muta soidi a tos os furistas.
Chalrrieira.

Brodas, siempre genial, eres aire fresco en este bochorno postvacacional, que es menos síndrome gracias a tus maravillosas rimas, que son recuerdos del pasado y deberían ser reflexiones sobre el futuro de nuestro pueblo y sus tradiciones...

¡Genial!


Saludos a todos los amigos del foro y de nuestro pueblo.


O Parral