San Martín de Trevejo - Caceres

Eu vos dias a tos , cumu ya habeis vistu hay un pardal en o foru.


Ei soy un pardal que nun le fai danu a naidi y vivu en unha enrramà da calli correeira dindu pa san peiru por detras de o campanariu y que ya quean poicas . Y solu comu miguitas que tiran os dagalitus que venin a merendal pa plaza y si algun dia nun tubera nà, que teña cuau o garzañoti cuandu ven pur aqui , que cumu teña muta fomi mo zampu y siria unha pena porque me cay muy simpàticu. Y me bañu en o pilon y en o rroyu cuandu pasa agua, que esti veran poicu me he bañau, solu cuandu ha vindu genti importanti a o lugar y didin que he porque nun ha chuviu pero ei creu que hay algu mais.

Me gusta mutu volar pur a plaza y por o llanu igleixa y apoixarmi en o canalon do tellau da caxa de o Comendaor( esperu que nun le molesti) pa ver a xenti pasar pa arriba y pa abixu y a os homis xugar a o dàpiti, pero a vedis dan mutas vodis y me y me asustan y de tantu velos hasta he aprindiu a xugar porque desde aqui les veu as cartas y as señas que se dan y veu que hay mutu fanfarron.

A mi me gustan mutu os cabalus pero nun que veñan a beber en o mei pilon ( que pa isu estan os otrus pilos) y me deixin as babaas y os cagallos; tamen veu caixi tos os dias pur aqui a J.L., esi ten que saber mutas coixas porque o veu muy observaor; o que ya nun veu son os cerrumiclis , esis se foran de o lugar ya fai mutus anus ( nun se o que paso ) didin que foran as avionetas de asulfatal.

Algunhas vedis tamen veu cumu tiran a xenti pa o pilon y mo pasu muy ben.

Pero ya nun he voltu a ver capeas con o bonitas y alegris que eran en a plaza y nun parei pa nun se dondi, que "cualquera vay " didin que se cain os paixarus de calor .. Total que son unha merda.

Me acordu que antis habia mutas galiñas pur as callis pero claro, agora con tantu cochi y tanta motu ni a xenti poi andar a gustu .Tendra que fel algu o Ayuntamentu por que istu asi nun poi continual.

Pero nun estoy solu en o lugar, ademais de as anduriñas que venin mutas en primavera ( que por certu me han ditu que hay unha que esta atrapà en un tozon de internet y me gustaria axuali , pero nun se dondi està ) , tamen hay mutus paixaritus y paixaro's, y cotorras, y gayus, y palumitas , y carrizas, y piriquitus , y cigueñas que ya solu ven en o veran y algunha que otra cutubia que se metin dondi nun le chaman , y antis tamen habia unha turtulita y un pavu, pero isu ya fay anus .

O que nun me gusta e que en o veran venin mutus rabi-largus y nos comin os figus y as ameixas y algun tomati que sembra a xenti en a horta cun a puiquita agua que sacan de o pozu. Aunque hay mutus que ya tenin acumitia de agua en os olivaris y hortas( ei creu que he pro os votus) y dispois didin que se acaba a agua .

Por certu un paixaritu me ha ditu que van a poñel un parqui de mulinillus gigantis en os montis( que meu) aunque ei nun volu tan altu nun me gustaria velos desde o lugar , y ademais isu nun le gustaria a nigñun paixaru.

Estis dias veu muta genti vindimandu cumu tos os anus, les deseu que saquin bo viñu, ( porque vos diguu un "secretu" a mi tamen me gusta) ; solu les piu que me deixin algun gallu en os parrais de o curral pa siguil picotendu algunha uva , que estan muy ricas.

Bueno ya vos deixu que esta oscurecendu y me teñuque dir que me esta esperandu a pardala en a enrramà, ya vos seguire contandu mais coixas de o lugar.

Piquitus pa tos do o Pardal.


Si me poñu pesau cumu otrus mo eidis ynun pasa nà; me diria pa otru lugar

UN BO PARDAL