San Martín de Trevejo - Caceres

Quiríu amigu "O saltu":

Un-ha ve mais, has estau a essa altura que te caracteriza, a mencional a minha prexencia eno Lugal i as suas cauxas. As tuas palabras fendu mención a Javier, m’emocionan i o mismu tempu sintu gran orgulhu d’habel nacíu enessi Lugal "sin parangón";dondi os homis i mulheris, se tenin que mil con cinta métrica, porque o metru se quea pequenu. Así pues, en nomi da minha familia i eno mei propiu, te doi as gracias, i t’envíu un abrazu mui gordu pa ti i pa Viky.

Mutas han síu, as muestras d’afectu i carinhu qu’hemus recibíu eno Lugal por parti de tos os cunhucíus que sabian os mutivus d’aminha prexencia alí; así comu aquelis que senteirorin o dumingu en missa .Pa tos estis manhegus i manhegas, ¡¡mutissimas gracias!!.

Vaya, a minha gratitú, a o sacerdoti "D. Jesús Martín" (filhu de tíu Rosariu).Nun foi un-ha, sinon varias vedis que mencionó a Javier o largu da missa. A verdais, nun esperaba qu’un sacerdoti de San Martín, oficiara a missa o dumingu passau eno Lugal. Cuantu nos emociona, cuandu é un cura manhegu que celebra a missa; i que ben chega enas homilías o corazón de tos noxotrus.

Chitu,Chalrrieira,Alfena, Nachitu,M.M (dinus quin eris). Ni porún momentu,m’he ulviau dos amigus i amigas do foru. A verdais,é qu’hasta esti momentu,he tíu poicu ánimu d’escribil eno foru,esperu qu’a partil d’agora, o volva a fel cona frecuencia de antis. Pues,hasta qu’hemus díu o Lugal ,aquí en caxa hemus estau bastanti rotus i con poicu ánimu. Aunque nunca deissarás de pensal ena tragedia que supón a morti dun filhu; cunfíu en que poicu a poicu,a oscuriai vaya dandu passu a luz. Sabel qu’as albas de Javier, ya están fundías cono nossu campu i a nossa Cru,nos dá mutu sosiegu. Pues, a noiti antis de qu’as suas cenizas, volaran poro nossu valhi,a passó enos pes da Cru.

A vedis,to nun é triteda. Esta manhán, m’entéiru qu’o tribunal qu’ha valorau o proyectu fin de carreira de "Daniel"(o otru dagal mei) le fai un-ha crítica estupenda,danduli o títulu d’arquitectu con alta nota.


Un forti abrazu a tos, FONTI NOVA

P.D. O dumingu de mairugá, estandu dandu un passeu pora carreteira questán fendu do conventu a pajarilhus,mencontru con duas manhegas que tamén feyan ganas d’almodal. -Pues ben!, un-ha d’elas,a quen mutu apreciu me didi:
-Sabis, que me caxu o día vintitres d’agostu?
-Nun me digas-repondu-
-Pues sí!, i o milhol de tó,é qu’o fayu conún homi qu’estoi locamenti enamorá d’él, i cona misma ilussión qu’o fidi fai cincuenta anus.

De to corazón, le desseu a Chunita i a Maximín un día inmensamenti feliz pa elis,yuntu conos seis filhus i netus. Que Dios vos conceda otrus cincuenta mais cheus de soidi; i que a chama d’essi amor que vos tendis, nunca s’apagui.

Como sempris, Fontinova, das en o clavu; hay que siguil pa yantri y, unha ve que has funcios terrenais, respectu de o tei fillu, has acabauas dondunus ejemplu de o tei mañéguismu, solu quea esi recordu que sempris te acompañará y te confortará sabendu que, ali, dondi esté, que será sin duda o millol sitiu, agradecerá o detralli que has tiu con seis restus mortais. Agó hay que reemprendel a andaura de o camiñu que paró a morti, con a satisfacción de habel feitu to que era precisu y mais.Sigui existindu tua quiria familia que, por o que se vé, te henchí de orgullu y desde aquí, te doy a enhorabuena por esi final con tantu exitu de a carreira de o otru fillu; sé, por experiencia propia, con que satisfacción se vivin esis momentus.

Tos deseamus que volvas a o foru, como antis, y nos enriquezcas con tuas opiniós ¡Ah! Y que sepas que en lo lugal tantu te honran os que te tratan ben como se honran a si mismus os que ius fain tan miriciamenti. Un forti abrazu pa ti y familia, y un saluu pa to o Foru. Chitu