EL CRISTU BENDITU

Poesia recopilada de Gabriel y Galan,en su libro Extremeñas.

EL CRISTU BENDITU




¿Ondi jueron los tiempos aquellos,
que pue que no güelvan,
cuando yo juí persona leía
que jizu comedias
y aleluyas también y cantaris
pa cantalos en una Vigúela?
¿Ondi jueron aquellas cosinas
que llamaban ilusionis y eran
a´specie de airinos
que atontá me tenían la mollera?
¡ondi jueron de aquellos sentires
las delicaezas
que me jizun llorar como un neni,
de gustu y de pena?
¿Ondi jueron aquellos pensaris
que jacían dolel la cabeza
de puro lo jondus
y enreäos que eran?
Ajuyó tuito aquello pa siempri,
y ya no me quea
más remedio que dilme jaciendo
a esta vía nueva.
¡ Ya no güelvin los tiempos de altoncis,
ya no tengo ilusionis de aquéllas,
ni jago aleluyas,
ni jago comedias,
ni jago cantaris
pa cantalos en una vigüela!....


Pensando estas cosas,
que me daban agojos de pena,
una vez andaba por los olivaris
que la ermita del Cristu roëan.
Triste y aginao,
de la ermita me juí pa la vera;
solitaria y abierta la vide
y entrémi por ella.
Con el alma llenita de jielis,
con el pecho jechito una breva
y la cara jaciendo pucherus
lo mesmito que un niño de teta,
juime ampié del Cristu,
me jinqué en la tierra,
y jaciendo la cruz,recé un Creo
pa que Dios quisiera
jacelme la via
una miaja tan sólo más guëna.
¡ Que güeno es el Cristu
de la ermita aquella!
Yo le ije, dispués de rezalí;
-Santo Cristu, que yo tengo pena,
que yo vivo tristi
sin sabel de qué tengo tristeza
y me ajogo con estos ansionis
y este jormiguillo que me jormiguea!
¡ Santo Cristu querio del alma!
Tu pasastis la jielis más negras
que ha podio pasal un nacio
pa que tos los malos güenos se golvieran;
pero yo sigo siendo maleto
Y a tí te lo digo lleni de vergüenza
pa que me perdonis
y me jagas entral en verea
Tu, que estas en la Crus clavaíto
pol sel yo maleto, quitame esta pena
que aentru del pecho
me escarabajea!....
¡ Jalo ansina, que yo te prometo
jacelmi bien güeno pa que Tu me quieras!

¡Que güeno es el Cristu
de la ermita aquella!
Pa jacel más alegri mi via,
ni dineros me dio ni jacienda,
polque ice la genti que sabi
que la dicha no está en la riqueza.
Ni me jizu marqués ,ni menistro,
ni alcaldi siquiera,
pa podel dil a misa el primero
con la ensinia los días de fiesta
y sentalmi a la vera del cura
jaciendu fachenda.
¡Pa esas cosas que son de fanfarria
no da na el Cristu de la ermita aquella!
Pero aquel que jaciendo pucheros
se jinqui en la tierra,
y, dispues de rezalí, le iga
las jielis que tenga,
que se vaiga tranquilo pa casa,
que ha de dalí el Cristu lo que le convenga.
A mi me dio un hijo
que päeci de rosa y de cera,
como dos angelitos que adornan
el retablo mayol de la iglesia,
Un jabichuelino
con la cara como una azucena,
una miaja teñía de rosa
pa que entávia más guapo paeza.
A mí me entonteci
cuando alguna risina me jecha
con aquella boquina sin dientis
rëondina y fresca
que paeci en cuanquín de una rosa
que se jabri sola pa si se la besa.
¡Juy, que boca tan guapa y tan rica!
¡Paece de una tenca!
A vecis su madri
en cuerinos del to me lo quea,
se poni un pañali tendío en las sayas
y allí me lo jecha
¡Paeci un angelino
de los de la inglesia!
Yo queria que asín, en coretis,
siempre lo tuviera
y cuando su madri vüelvi a jatealo,
le igo con pena:
-Ejalo que bregui,
éjalo que puéa
raneal con las piernas al airi
pa que críe juerza
¡Ejalo que se esponji un ratino,
que tiempo le quea
pa enliarsi con esus pañalis
que me lo revientan!
Ejamelo un rato
pa que yo lo tenga
y le jaga cosinas bonitas
pa que se me ria mientras pernea!
¡Que goci, que goci,
to lo que asin quiera;
que pa jielis, agojos,y aginos
mucho tiempo quea!
Ejamelo pronto pa zarandealo
Ejame el mi mozu pa que to lo mezca
pa que yo le canti,
pa que yo lo duerma
al ton de las guapas
tonás de mi tierra,
continas y dulcis
que päecin zumbíos de abeja,
ruíos de regato,
airi de alamea,
sonsoneti del trillo en las miesis
rezumbal de mosconis que vuelan,
u cantal dormilon de chicharra
que entonteci de gustu en la siesta...
miale como bulli
miale como brega,
miale como sabi
óndi esta la teta!
Si conocis que tieni jambrina
dali una gotera
pa que prontu se jaga tallúo
y amarri los chotos a puro juerza
¡Miale que prontinu
jizu ya la presa!
¡Miale como traga; mia que cachetinos
mientris mama en el pecho te pega!
¡Miale que arrempujonis da con la carina
pa que salga la leche con priesa!
¡Asin jacin tambien los chotinos
pa que baje el galro seguio y con fuerza!
Ya se va jartando. mia como se rie,
miale como enrea.
Jasta el garguerino
la lechi le llega,
por que va poniendo cara de jartura
y el piquino del pecho ya eja
Quítalo enseguia pa que no se empachi
y trai que lo tenga
¡Clavelino qerio del güerto!
ven que yo te quiera,
ven que yo te canti
ven que yo te duerma,
al ton de las guapas
tonás de mi tierra.
pa que pueas cantalas de mozo
cuando sepas tocar la vigüela.
¡Venga el mi mocino
venga la mi prenda!
Ven que yo te besi
con delicäeza,
ondi menos te piquin las barbas
pa que no te ajuyas cuando yo te quiera,
ni te llorin losojos,ni arruguis
esa cara más fina que sea,
ni te trinquis p átrás enojao
si tu padri en la boca te besa...

Mujer, ¡mia que lindu
cuando ya esta dormío se quea!
¿Tu no sabis por qué se sonrie?
Es porque se sueña
que anda de retozus con los angelinos
en la gloria mesma...


¡Que guapo es mi neni!
¡Ya no tengo pena!
¡Que gueno es el Cristu
de la ermita aquella!