Eljas - Caceres

Propoñu que u Aisuntamentu en ve de contratar obreirus pa rozar as zarzas das cunetas -Ya estuveran a puntu de quimal tos pinus da fonti sobereira, purque en vez de rozar e mais cómodu quimal-, us contratin pa recollel a cantidai de latas de cerveza u refrescu que tiran en´as mismas, certas pesoas que se coñoci que nun foran a escuela u son da piol calaña. Foy u oitru día u Lagal du mediu y me encontru u baissal a barreira du lagal que da a pesqueira "de Menti", to cheu de latas de bibía, latas de conserva cun tapa cortanti ... To esta bassura próxima u ríu
(! y a que habirían tirau dentru du cauci!). Me causa enormi disgustu ver a basura nas cunetas cuandu vo u campu, pus temus "inda" un´a Naturaleda privilegiá que se supón que dibíamus cuidar en ve de siguir distruíndula. Digu istu purque u ríu nunca se había secau,tiña pecis, ranas, anguilas ... POicu a poicu liquidamus to. Recordu,pur ejemplu, fay mutus anus, cómu vi ital cal, impunimenti, nu podu da Reina, pa pescal. Pur certu, ¿ Nun pareci algu descabellau pirmitir que cunstruya piscina particular a to aquel que se le planti, sendu un ríu u nosu de poicu caudal y que nun e u Ebru? Añoru us tempus en que nun había piscinas a mansalva, pero que había un ríu cun esplendorosu caudal cheu de vida y que as novas generaciós nun volverán a disfrutal nin en pintura.