Casares de las Hurdes - Caceres

Algu que jué jundamental en las cumunucacionis de las jurdis altas y que contribuyó a que lus jurdanus puieran tení un pocu mas de libertá en sus ajetreus de ir y vení,jué sin duda el "cochi de linia".El coló verdi caqui adornaba su carruceria,una escalera subía po la parti datras hasta la baca que se cunvertía en todo un mercadu de enseris,inclusu animalis en banastrus ivan dallá para ca.El maleteru siempri iva hasta lus topis:cerezas, patatas,acitunas...Unus viajaban por placé hasta serrailla,otrus pa arreglá algun papeleu,visital el mercau de lus sabadus u simplimenti disfrutá de lus carnavalis de lus torus.El cochi de linia se convirtió en toda una necesidá para unus pueblus dondi había pocus cochis.El conductó y el revisó también se cunvirtierun en unus complicis mas del viajeru y lus recaderus en muchus casus.En una ocasión un señol de jurdi viajaba para arreglarli una tecla a la maquina de escribil de su hija que estudiaba juera.Toda una odisea era arreglá una teli, una arradiu, etc.Algunus lu usaban pa jacé el sexu jasta la ciudá y otras vecis de enlaci pa il a Salamanca al barriu chinu y predersi en el anonimatu y disfrutá a lu grandi.La nievi a vecis cortaba la carretera y lus viajerus tenian que bajarsi a curtá ramas de pinu pa que jicieran de cadenas en las rueas y que no patinasin en el yelu y podel pasal el tranci.
lus añus 80 juerun el esplendó de aquel cochi.No era mu comudu, ni había mucha calefacción,el motó jacía muchu ruidu y lus asientus de eskay resistian todu tipu de agresionis.Los pollus y lus cerdus chicus,
a vecis ivan entri las piernas u en el pasillu porqui iva todu abarrotau.
Luegu vinu el de Plasencia peru ya no jué lu mismu,la magia que había en aquel vieju trastu era diferenti.Su presencia era sinonimu de fiesta ,era negociu,era placé y cuandu partía siempri se escapaba algún lamentu,cumu deseandu montarsi en aquel montón de yerrus y cruzál la frontera salmantina para cuntá y sel participis por lu menus un dia de las mejoris condicionis de vida de lus de la ciudá.Era la fuga,el despertál, el progresu, nunca hubu nada cumu el cochi de linia.En el regresaban lus nuestrus de suiza,de lus jotelis cuandu golvian de las tempuradas.Detras currian lus muchachus con lus arus y las ruedas y algún valienti se encaramaba en su escalera posterior y viajaba gratis unus kilometrus.Servía comu frenu a los fitipaldis bajandu de la sierra y esu impedía batir el record.Cada dia algunu superaba el de el dia anterior, por lo menos de boquilla.Otras veces había que recogerlos de entri las mugarizas con el mercedis que traian de Suiza.Trola sobre trola,la exageración y la ironía acompañaban chatus y cervezas y perdé al tuti era la catastrofi semanal de mas de unu que se veia obligau a pagarli las cervezas al adversariu.!Que humillación!.