Alcollarín - Caceres

Me paece mentira
pensal que yo sea
aquel mozu juerte
que labró la tierra.

Aquel que cavandu
diva a la cabeza
y en todus los cortes
pusu la bandera.

Aquel que no tuvu
domingos ni fiestas
pa escansal un día
de la brega aquella.

¿Qué jué de sus años?
¿Qué ganó su juerza...?
tantu como estuvu
juerte a la pelea?

Nueve años tendría
cuandu ya en la sierra
me queaba solu
al cuidiao de ovejas.

¡Qué nochis tan largas
las nochis aquellas,
cuando rejilando
me dormía en la jerga
sin otrus ropajis
que una manta estrecha!

Asín juí creciendu
entre aqueyas breñas
y entre los peñascos
de las barranqueras.

A los quince años
ejé las borregas
pa dilmi a un descuajo
que había en una jesa.

Lo mesmo que un roble
de juerte yo era...
y era toa mi cara
comu las cerezas.

Tantu trabajaba
que el amu e la jesa
al remate el corte
me llevó a su vera.

De gañán estuvi
en la casa aquella
cincuenta y seis años
sin nochis ni siestas
trabajando muchu
como en propia prenda.

Luegu murió el amo
y ejó sus riquezas
a dambos sobrinos
con ganaos y tierras.

Estus me aventaron
porque la jacienda
quieri jenti moza,
no presonas viejas.

Y hora aquí me jayo
llenu de probeza
sin otru alimentu
que el de mis tristezas.

¡Ya naide me quieri!
¡Ya todos me avientan!
¡Ya lo perdí todu!...
¡Ya no tengu juerzas!

Hola "Los ojos . . ." preciosos versos campusinos, reflejan la vida real, la de nuestros bisabuelos, abuelos, padres, algo de ello todavía queda para estos, nuestros días, que nos hace temer lo venidero y la respuesta de quienes creemos que no nos fallarán. Mientras tanto llega todo ello, reflexionemos un poco y aprovechemos hoy lo que es de hoy, que mañana Dios dirá. Un saludo.