Alcollarín - Caceres

VARÓN

¡Me jiedin los hombris
que son medio jembras ¡.
Cien veces te ije
que no se lo dieras,
que al chiquín lo jacian marica
las gentis aquellas.
Ahora ya lo vide, y a mi no me mandis
más vecis que güelva.
Te largas tú a velo,
que pue que no creas
tu cuerpo ha parío aquel mozu,
ni que lo cebastis con tu leche mesma,
ni que tieni metía en la entraña
sangri de mis venas.
N’ámas de mimarros
y delicaezas,
se ha quedao lo mesmo que un jilo,
paliúcho y sin chispa de juerza.
Ca istanti se lava,
ca istanti se peina,
ca istanti se múa
toa la vestimienta,
y en los dientis se da con boticas
de unos cacharrinos que tieni en la mesa,
y remoja el moquero con pringuis
n’ámas pa que güela.
¡Jiedi a señorita
dendi media legua!
Se levanta a las nuevi corrías
y a las doci lo menos se acuesta.
¡Va a ponersi pochu
si acontina de aquella manera!
¡Güeno está pa mandalo a bellotas,
pa ayualmi a escuajal en la jesa,
pa jacel un carguju de tarmas
y traelo a cuesta,
u pa estalsi cavando canchalis
dendi que amaneci jasta que escureza!
Lo muchachos de acá me esconfío
que mos lo apedrean
cuantis venga jiciendo pinturas
u jablando de aquella manera:
y verás como el mozu no tieni
ni agallas ni juerza
pa, al primero que quiera mofiarsí,
rompeli la jeta.
Ya no dici padri,
ni madri, ni agüela.
<<Mi papá, mi mamá, mi abuelita...>>
asín charlotea,
como si el mocoso juesi un señoruco
de los de nacencia.
Ni mienta del pueblo, ni jaci otro oficio
que dil a una escuela
y palral de bo bás que allí aprendi,
que pa na le sirvin cuantis que se venga.
Pa sabel su saberis le ije:
<<Sácame la cuenta
del aceiti que hogaño nos toca
del lagal po la parti que es nuestra.
Se maquilan sesenta cuartillos
pa ca parti entera,
y nosotrus tenemus, ya sabis,
una media tercia
que tu madre hereó de una quinta
que tenia tu agüela Teresa.>>
¡Ya ves tú que se jaci en un verbo!
Sesenta la entera,
doci pa la quinta,
cuatro pa la tercia,
quita dos pa una media y resultan
dos pa la otra media.
Pus el mozu empringó tres papelis
de rayas y letras,
y, pa esenrearsi
de aquella maeja,
ijo el aceiti que a mí me tocaba
era << pi menus erre>>, ¿te enteras?
¡Pus pues dil jiciendu
las sopas con ella!
¿Y ésos son saberis?
¡Esas son fachenda!
No le quisi mental del guarrapo
ni icile siquiera
que hogañazo vendimos el churru
pa compral un cachujo de tierra.
¡Allí no se jabla
de esas cosas, ni en ellas se piensa!
N’ámas que jaci comel confituras,
melcal vestimientas,
dirsi a los cafesis,
dirsi a las comedias
y palral de bobás que no valin
ni siquiá una perra.
¡Jolgacián como el nuestro muchacho
na va a habelo, si aquí no se almienda!
Yo no los distingo de otros señorinos
Que con el se ajuntan y jolgacianean.
¡Son como maricas!
¡Juy, qué vestimientas!
Ves una presona
por detrás, en la calli, tan tiesa
y endi lejus no sabis de cierto
si es machu o es jembra.
Güelin a lo mesmo,
como las ovejas,
y p’aquí no es asín, que ca cosa
güeli a su manera:
güeli a macho la carni de hombri,
y la carni de jembra da a jembra.
Hay que dil a buscal al muchacho
Cuantis que se puea,
Y le dicis a aquellos señoris
Que esu que no quita pa qui se agraeza,
pero que a su padri le jaci ya falta;
y asín se las enreas.
No lo quiso jolgacián, aunque muchus
saberis trujiera.
Y no es esu solu lo que a mí me enrita,
que otras cosas me jacin más mella...
Hay que dil a buscalo ca y cuando:
que venga, que venga;
poque, mira: ¡Mejiedin los hombris
que son medio jembras!...

JOSE . MARIA. GABRIEL Y GALAN.