Ahigal - Caceres

SEPA USTE, FORASTERU ...

Me trompecé el’otro día
con un forasteru,
mu compuestu y mu finu,
que se llegó ende la capitá,
y decía que semus lus extremeñus
incurtos y de mu mal jablá.

No soy yo una jembra
de mucha gramática
ni tampoco mu estudiá,
pero asina jablaba mi madre,
asina jablaba mi agüela,
asina jablaban lus de mucho más pa’trás,
y asina jablo yo,
pá que no se me olvide nunca ni una letra
de la que jablan también
nuestrus más grandes poetas.

Sepa usté, señó mío,
que cuandu un extremeñu jilvana
toas y ca una de las letras,
empalma comu una melodía tras otra
lo que no es otra cosa
que la lengua que se jabla
en nuestra tierra.

Sepa usté, forasteru,
qu’en cá lugá se jabla una lengua.
Y si no,
aviente, aviente usté una mirá
por lus jondones de la jistoria
a vé si se da cuenta
que no semus lus extremeñus
más incurtos que lus que nacierun
ajuera de la nuestra Extremaura.

Sepa usté, forasteru,
que sabemus mu requetebien leé y escrebí
lus extremeñus.
Pa eso, cuandu eramus zagalinas,
un maestro mu resabio,
y mu letrau,
nus enseñó en la escuela.
Y pa encandilá lus nuestrus pensares
no nus jacen falta
ni las eses, ni las jerres.

Y ya, pa terminá,MARÍA JOSÉ MATEOS POMBERO.- BADAJOZ
si tiene una miajina de vagá, aviente usté
una ojeá por lus librus
de Luis Chamizo ó
de Gabriel y Galán
a ve si encuentra usté, señó mío,
arguna incurtura en su pluma desgarrá.

( MARÍA JOSÉ MATEOS POMBERO.- BADAJOZ )

El segador


Límpiate er suor, muchacho,

que por tu cara chorrea;

sua, pa que aluego la jambre

no te jaga cer tachuela.

Tiende bien la joz, asina,

y doblando la muñeca

dale güertas ar manojo

que no se ajuya un brenza;

y que vaya limpio er tajo,

que la espiga que se quea

esperdiciá en er rastrojo

o regüerta entre la tierra,

es suor de nuestra frente;

es sangre de nuestras venas;

es cuerpo de nuestro cuerpo

y juerza de nuestra juerza.



Y una espiga, aunque sea chica

y escalichá, representa

toito un año de trebajo

de faitiga y de miseria.

Verás como en er invierno,

cuando la canar gotea,

y se cubra to de nieve,

y trebajar no se puea,

no tendremos que afrentarno

ar que con usura presta,

y un churrusco, aunque argo negro,

no fartará en nuestra mesa.


Límpiate er suor, muchacho,

que por tu cara chorrea;

sua, pa que aluego la jambre

no te jaga cer tachuela.

( Ventura Villarrubia Pila )

CUCHICHEO EN LAS ESQUINAS.

EL (Acercándose)
-¿Sabis lo que idi la genti?
Se runrunea por el pueblu
de que tú y yo semus novius.
A ti ¿qué te paicí d'esu?

ELLA (Con desenfado)
-¿A mí? ¿Qué quiés que me paiza?
No soy amiga de cuentus;
mentra que no sea verdá
a mí, ¡me importa un pimientu!

EL (Persuasivo)
-Digu yo, que bien poíamus
arreglalmus, si es que és esu
lo que quien idil la genti.

ELLA (Con desplante)
-¿Arreglalmus? ¡Miá que frescu!
Arréglati tú si quieris;
yo no necesitu arreglu.

(Bajando la voz)
!Mos están mirandu;
dejemus los cuchicheus
y ajila jadia tu casa
porque aquellas que allí veu,
por dalli gustu a la lengua,
levantan los piés del suelu
a la que menus te piensas,
y yo, no quieru hablaerus.

EL (Insistiendo más animado)
-Buenu, posváilu pensandu
porque yo, ya estoy en ellu;
máscalu tú pocu a pocu
y el domingu mos veremus
cuandu salgamus de misa;
un ratinu por lo menus
vamus juntus a la plaza
aunque allí mos separemus;
y asina, poquinu a pocu,
mos vamus cojiendo apegu;
qu'el roci jadi el cariñu,
idi un refrán de mi agüelu.

(Amoroso)
Tú a mí ya m'estás gustandu
y creu que t'estoy queriendu,
porque cuando voy arandu
algunas vedis trompiezu;
y se tuerci la besana
siempri que de ti m'acuerdu;
y doy comu espanturrionis
porque paici que me duermu;
y no cundi lo que jagu
porque pierdu muchu tiempu.

ELLA (Reprensiva, alzando la voz>
-Y perderás el cogoti
si siguis como estás iendo
a rondal a la mi esquina
comu los gatus en celu;
que creis que no te vé naidi,
peru yo bien que te veu:
jadiarriba y jadiabaju
jadiendo lumbri en el suelu
cuandu arrastras los zapatos
pa que, la que t'está oyendo,
sepa que llevas tachuelas
en los borceguinis nuevus.

Y jata zampá en la cama
barruntu yo el tachueleu
que formas tóitas las nochis
pa que te lairín los perrus;
y t'estás jata bien tardí
armandu esí escapoteu
pa que no duerma mi agüela
y esté toa zurrá de mieu.

(Burlona Imitándole)
Luego irás a la senara
y te cais muerto de sueño:
Y se tuerci la besana
siempri que de ti m'acuerdu.

(Con coraje amigable)
¿Y no te dará vergüenza
idil lo qu'estás idiendu?
Llévala siempri derecha!
y de torcella, ni un pelo!
Piensa en mí tó lo que quieras
pero el surco, bien derecho!
Porque si no lo enderedas,..

(Haciendo un mohín cariñoso)
¡cuéntati que no te quiero!

Gonzalo Alonso Sánchez