San Vicente de Alcántara - Badajoz

Voy a contaltí aqueyo, mujel mía;
te voy a icil las gielis de mi alma,
el por qué de chequinu
siempre quería estal solu en la montaña;
el por qué no reía
cuando diva a tu casa
y estaba siempri serio, siempri tristí,
como las nubes pardas.

Yo nunca tuví padres,
juí hijo de la desgracia,
juí un pilongu, ya ves, un hespiciano,
un naide, un peazo e zarza.

Solu tuví querel de dos presonas:
de tío Lino y tía Cándida;
los dos que me sacaron del hespicio
pa tenelmi con ellos en su casa.

Eran dambos tan güenos y sentios
que algunas vecis me nombraban...
¡y si vieras, mujel, cuánta alegría
al oilos icil esa palabra!

Entonces de repente toas mis gielis
ajuían de mi alma,
como ajuyen los lobos del cordero
al sentil los pastoris que lo guardan.

En el pueblo, en ves de Federico,
pilongu me nombraban;
las madres no querían vez nenguna
el velmi con sus hijos pá la plaza;
yo siempri estaba solu,
y por esu me diva a la montaña.

Yo era pa toa la jenti como un trapo
lleno de repununza;
los que mejol chalral quisun conmigo
me jerían más fuerte con sus chalras.

Unas vecis me iclan: -Pilonguinu,
el velti siempri solu mos da ansia;
mos dueli que los mozus del lugal
tos te ajuyan la cara,
como si tú tuvieras culpa alguna
de otras presonas malas.

Yo antoncís no poía estal oyendu,
y ajuía corriendu a la montaña,
a lloral ayí solu toas las gielis
que ajogaban mi alma.

No quería pensal si tenía padres,
y con ellos ca y cuando me soñaba;
los vía cerca e mí, yamalmi hijo...
¡qué dulcis me sabían sus palabras!

Yo abría los brazos pa apretal a dambos
y ellos tamién mu juerte me abrazaban;
dicían que eran felices con jayalme
y que todas mis gielis los contara;...
yo antonces las icía...
¡Y si vieras qué tristis se queaban!

Antoncis me jacian más caricias
y me daban más besos en la cara;
mí madre me cogía como a un neni,
Iciéndome: -¡Hijo mío de mi alma...!
Qué alegre estaba yo, mujel quería,
cuando to estu soñaba,
y qué tristí, qué tristi iba queando
al dispertal solinu en la montaña.


un abrazo para todas y un recuerdo para las que lla no estan

p.d esta poesia corresponde a
Rufino Delgado Fernandez. 1925