| 20-04-10 11:09 | #5129461 |
Por:luis barriga pacheco   |   |
| los que marchamos Agilen p'alantre los que tién curtura! ¡Agilen p'alantre los que tién talento! ¡Qu'agilen delantre tós los qu'han leío porque yo no pueo! Na más soy poeta, de los de nacencia, de los extremeños. Y afilo mi pluma con la mi experencia, y arrebusco, y jimplo, y escarbo'n los verbos. ¡Yo diré detrás con el mi magín jilvanando versos! Y es que yo cavilo: Pa tirá del carro d'este galraero a mí me s'ocurre que los ilustraos tién que dir primeros. Y aluego nusotros, con versinos nuevos, manque'n jarapales nus jagamos trizas nuestros sentimientos, pasino a pasino jaremos sendero. Y arrebuscaremos aquellas vereas arrescondiínas por los nuestros pueblos; castúas palabras, aquellas qu'antaño icían los agüelos; recaínos nuestros, los mesmos qu'hogaño s'enrëan con el tiempo; y güenos poemas, versos qu'en la tierra jueron enraigaos por jondos pensares de grandes maestros. ¡Versos qu'entoavía nus calan mu adrento! Porqu'Extremadura es tierra arrogante qu'esparramó cielo por los escondrijos más arrebuscaos d'este firmamento; y los que jacemos memoria d'aquello, con la savia nueva de los nuevos versos, a viejos poetas jonramos sin mieo. ¡Agilen p'alantre los que tién curtura y nus abran paso a los poetas nuevos! Pa que asín s'empollen nietos y bisnietos de la nuestra galra... ...¡qu'entoavía hay tiempo! Y palren asina, y sin miëo manejen tós los nuestros verbos, esos que nus jinchan el pecho d'ergullo a los extremeños. ¡Qu'agilen p'alantre, qu'agilen con ganas los que tién talento, los que tién curtura, los nobles, los güenos, los sabios maestros! ¡Naide s'acagace! ¡Naide tenga mieo! Qu'asín arrejunde dende su nacencia la juerza d'un pueblo que labró los mares más arrebataos y sembró caraite'n la tierra adrento regao con sangre, suores y esjuerzos. Y asina emigraron nuestros campusinos, nuestros labraores, los nuestros ancestros. Y asina soñaron gorvel ergullosos con una mijina de gloria y dinero. ¡Pero jueron tantos los que se quearon durmíos en el tiempo! Su lágrima seca dio retoños nuevos, y endispués los nietos y aluego'l silencio. Y quiciás por eso hoy endilgo un chillo con töas las mis juerzas a ese nuestro cielo, al desparramao por los escondrijos más arrebuscaos d'este firmamento: ¡Gorvel emigrantes! ¡Gorvel extremeños! ¡Gorvel cuantiantes manque na más sea pa la fiesta'l pueblo! ¡Gorvel con la galra qu'arrebujaína'n aquellos jatos sus llevastis lejos! ¡Gorvel a la tierra d'aonde sus llevastis la vos qu'andenantes l'ascuché al agüelo! ¡Gorvel emigrantes! ¡Gorvel cuantiantes pa danos aliento! ¿No veis que nusotros, los qu'aquí queamos, los que reguñimos con nusotros mesmos sin tirá con juerza del carro eschangao d'este galraero, dende que sus juistis pa esos andurriales, pa esos otros pueblos, semos unos probes güérfanos de verbos? | |
| Puntos: | |
| 20-04-10 12:20 | #5129789 -> 5129461 |
Por:pulguitai   |   |
| RE: los que marchamos A mi, que me gusta la poesia, verla escrita en nuestra lengua, con tanta verdad encerrada.............. que bonito!!! Que sigan alumbrando los versos el camino de la esperanza que sigan llenandose los corazones de abrigos para el alma..... Que sigan los poetas creando andanzas, que mis ojos vean y mi cuerpo se estremezca al sentir la lengua de nuestras tierras. (bueno espero haber dado la talla) | |
| Puntos: | |
| Tema (Autor) | Ultimo Mensaje | Resp | |
| Un viaje en tren Por: Zoilo72.tf | 24-04-12 12:04 Zoilo72.tf | 0 | |
| Un vehículo atropella a un niño Por: gelger | 24-01-11 22:55 BUDDY | 2 | |
| SOY NUEVA Por: colindra | 11-12-09 00:18 extremeña- gaditana | 6 | |
| Nuevo en el foro. Por: candido8 | 29-11-09 19:23 ladano | 2 | |
 |  |  |