Ribera del Fresno - Badajoz

Tosco me llaman a mi
y de pena m' estremezu,
te recuerdo tós los días
y siempri lloro d'adrento.

De tenelti yo tan leju,
de no poel admiralti,
y no poel bebel tu agua
y no respiral de tu airi.

De no segal esi trigo
como bien lo jacía antiis,
empapaito en süor
jata el caer de la tardi.

Encinas del alma mia
vusotras sol me quitábais,
y mi perro amigo fiel
siempri escuchaba mi canti.

La pena truje conmigo
cuando tuve que dejalti,
dilme a emigral a otras tierras
y asina salil p'alanti.

Pero de ti no m' orvio
Extremadura preciosa,
que te tienin oprimia
y eris tú la mas hermosa.

Tus costumbri yo no orvio,
no he poio cevilizalmi,
pero m' obligo salil
pa no morilme de jambri.

¡Despertal lus Extremeños
que nuestra tierra es mu grandi!
¡Que daria pol golve
y nunca mas ya dejalti!

Vivil en ti tierra mia,
con mi brazos abrazalti,
que n'es de güen Extremeño
dilse lejus y orviati.