Villardeveyo - Asturias

LA XANA Y EL XATÍN
Un día una muyer camín de la braña pasó xunto a un pozu d'agua y alcontrose con una moza rubia y garrida, que pernuncia estes pallabres máxiques:
"Entra pintu, sal bragáu, cuna campaniella al llau."

L'efeutu de tala fórmula ye que surde del agua una vaca de calter descomunáu y xunto a ella un xatu tamién escelente. La moza rubia entós ofrez-y a la brañera la vaca y el so xatu, pero con una condición: La brañera sólo deberá muñir una de les tetes de la vaca, dexando'l restu pa'l xatu.

La brañera marchó percontenta pa casa y durante munchu tiempu aprovechó la muncha llechi que-y daba la vaca y cumplía la condición que-y mandó la xana. Pero un día la codicia va inclinándola a dir muñendo les otres tetes, desobedeciendo lo que-y dixo la xana, colo que'l xatu va enruinando y empeyorando. D'esti mou, resulta qu'un día la brañera alcuéntrase con que na so cuadra ya nun tan nin la vaca nin el xatu maraviosos.

Ante esta desapaición la brañera sube al llugar del pozu del agua pa conseguir dalguna desplicación. Y, efectivamente, la moza diz-y a la brañera que perdió la vaca por nun cumplir la condición que-y impuso, al muñir demasiao la vaca y nun dexar llechi abonda pa'l xatín



UN SALUDIN

LA MANO FRÍA
Según cuenten dellos vecinos d’una aldega de Samartín de Valledor, parroquia del conceyu de Allande, vivía hai tiempu nuna casa pequeña, un albañil tranquilu al que-y prestaba falar pelos coldos, pero que yera mui queríu polos habitantes del pueblu porque nes sos charres surdía, de xemes en cuando, guapos cuentos qu'afitaben l'atención de neños y mayores; sobre too cuando se reuníen nel llar. El llugar onde vivía, dalgo allonxáu del pueblu, y arrodiáu d’árboles, daba un ambiente especial a les polaviles o filandones (xuntances familiares y/o vecinales alredor del llar nes llongues nueches d’iviernu pa filar, contar hestories) que se facíen na so casa: los páxaros, el burbús del vientu y esa particular oscuridá que se siente cuando se ta acabante la última lluz, ayudaban a respingase un tanto enantes d’empicipiales.
Un día de los suyos, y que camudaría la so manera de ver y sentir les coses d’esti mundu, taba cenando con toa tranquilidá l’albañil; por toa lluz, un candil per dalgún llau, un tueru n’áscuares nel que caleciere la cena.. Taba solu y nun atopaba na cena más consuelu que’l que puede alcontrar un mayestru en reñer a un escolín; nun pensaba muncho, sinon que dexaba vagar la mente per ente lo insípido de lo que comía. Asina lo llevaba: comer y llavar la cacía de cualaquier manera, sentase a fumar l’últimu pitu del día mientres se va enfriando la casa y preparase p’achucase.

A puntu taba d’apagar el candil, cuando una solombra indefinible apaeció pela paré onde nun tendría que tar, pela que sí tendría llueu, y per otra tercera dempués, que yera onde taba’l candil, y apagó la vela.

Buscó caricós nel feble resplandíu del llar, buscó cerilles, y trató de prender la vela. Nun había manera. Lo intentó más veces, tantes como-y permitió’l miéu qu’arizaba’l llanuxu de la so piel, esi mesmu miéu qu’él espetara nos rapazos colos sos cuentos. Casique de sópito, segundos anantia de prender la postrer cerilla, dalgo asina como una mano fría, daqué frío, una textura fría, un calor fríu, posóse nel so gargüelu.

Con dalgun zarapicu en suelu, averóse a la puerta y, como intentando nun incomodar a quien ellí hubiera, corrió’l piesllu, abrió llixeramente la puerta, pasó al otru llau como queriendo ser más flacu de lo que yera y bendixo aquella lluz feble que dexaba ver les solombres de los árboles como solombres azules d’un cielu prietu. Fixo esfuerzos pa nun correr, guetando alcontrar lo que-y quedaba de cabal; y empobinóse a casa del so amigu del alma, a que-y dexara dormir na so casa, a que-y quitara esi fríu del so cuellu.

Dicen la xente del llugar que, acabante llegar ante’l so collaciu, miró-y con güeyos axorizaos, que quixo falar pero nun pudo y que se desmayó. Aquel, esmolecíu, consiguió reanimalu, con tortes, con agua, cola fresca de la nueche.

Nada pudo facer entós l’albañil para torgar qu’unes llárimes finaran el so camín ente toes les perfondes agurries qu’esa mesma nueche aprucieron na so cara.



un saludin

El conocer la mitología asturiana debería de ser por lo menos opcional,ya que muchos de nosotros ni una pequeña parte.Gracias por entretenerte y entretenernos Toñi.

Un besín

ho entiendo bien lo que quieres decir, si os gusta y entretiene pondremos alguno.

un saludin

perdon soy toñi