Tineo - Asturias

El gobiernu de Zapatero enfotóse nel decretu y sacólo p'alantre, tristemente col consentimientu de los sindicatos


M.ª ESTHER GARCÍA LÓPEZ

El secreto de una buena vejez no es otra cosa que un pacto honrado con la soledad. Porque la vejez y la soledad son tan irreversibles como la muerte. Por fortuna, recién empecé a pensar en esas cosas bastante pasados los sesenta años». Son pallabres del Premio Nobel Gabriel García Márquez.

Nesta etapa de la vida llegues a un puntu nel que'l mundu t'escaez, nel que de repente te consideren «fuera de circulación». L'avieyar ye una consecuencia fisiolóxica del pasu'l tiempu y hai que llevalu con optimismu y naturalidá porque ye llei de vida, pero los mayores tienen inda muncho qu'aportar a la sociedá a esta sociedá nutrida d'egoísmu y onde los xóvenes nun atinen a garrar el testigu que-yos apurren la sabiduría y la esperiencia de los mayores. De sópitu cállase la voz de quien entovía tien muncho que dicir. Invítovos a lleer "Pacto de sangre" de Mario Benedetti, un testu que fala de la mudez de la vieyera, que nun tien esperdiciu.

Nestos tiempos que vivimos, ye tal el cultu a la mocedá y a la «belleza», que nos tienta a toos a querer siguir siendo mozos eternamente. Operaciones de tou tipu pa los más pudientes, y toles maneres de cultu al cuerpu, espardíes dende la publicidá, intenten convencenos de que nos «neguemos» a cumplir años. El mesmu García Márquez, pa referise a la edá, diz qu'a partir de los cincuenta los cumpleaños debieren celebrase por décades. Nun taría mal. D'ilusiones tamién se vive, pero pa vivir, amás d'ilusión necesítase dalgo más. Esta situación de la tercera edá, eufemismu col que tapamos la palabra vieyera, trata de facese más llevadera nes caberes décades con una pensión digna, que permite a los mayores tener pa los gastos de primera necesidá y a dalgunos pa dalgún qu'otru caprichu. Lo malo ye qu'hai pensiones de miseria que cuasique nun dan nin pa malvivir. Nun día pases de l'actividá llaboral al mundu de la xubilación y, en dalgunos casos, más bien en munchos, espiértase al día siguiente en situación cuasique de probitú. Pero estes situaciones de diferencia van a agravase nes próximes décades pa una gran mayoría de la población de mayores. El Gobiernu de Zapatero enfotóse nel decretu del pensionazu y sacólo p'alantre, tristemente col consentimientu de los sindicatos. Un Gobiernu que nos ta desmontando l'Estáu de bienestar al que tanto costó llegar. Nel añu 2027, de xuru que los pensionistes serán muncho más probes. A la so soledá, y otres collacies como l'abandonu y l'escaecimientu, que tamién medren por momentos na nuesa sociedá, va a sumase la falta de medios económicos pa sostenese, porque nun podemos escaecer que pocos, mui pocos, van a llegar a tener 38,5 años de cotización pa poder cobrar el máximu de la pensión, que tamién pue llegar a ser ridículu. Mui pocos, sabiendo de la situación llaboral de la nuesa mocedá. Repasando datos de los que dellos espertos nos ufierten, los pensionistes de 2027, van cobrar de media un 20% menos de pensión que los que la tamos cobrando n'actualidá, pero ye qu'esa media nun va afeutar a toos por igual. Dalgunos perderán un 7%, o un 10%, mientres otros cobrarán hasta un 50% menos.

Un mundu de desigualdá social nel que cada vez los ricos son más ricos y los probes más probes al que nos ta llevando'l Gobiernu socialista rexíu pol testerón de Zapatero, a costa d'una riestra d'engañifes pa convencenos de que la conxelación de les pensiones, retrasar la edá de xubilación, les midíes de reforma llaboral y tolo que nos vendrá de postre son midíes necesaries y pensaes. Podemos echanos a temblar.