Serrapio - Asturias

Vegabaxu, Fonfría y E1 llegu taben toos concentraos; d’esta manera, puíen ayuase si facía falta.
Aquel xueves baxaron toos bien temprano cola caminá; la verdá ye qu’había poco que baxar, porque colo que comíen les vaques nun poíen dar nin lliche, nin mantega nin ná; pero yera igual: los xueves había que baxar al llugar pa ver a la muyer y a los rapazos y pa subir vianda pa tola seman a; y, poco o muncho, había que traer pa casa’l lliche deburao pa los gochos y la mantega pa lleval o al mercáu de los viernes. Mientras baxaben los mayores, queaben nel mayéu los rapazos.
E1 día taba embacinéu, fríu y melu, col ciirzu bexu, a gates pelos regueros; si templaba un poco, a neide–y estrañaría que nevase pela terde; así ye que baxaron llueo y quearon en vese nel chigre de Lola la de Collanzo, sobre les dos de la terde pa tomar l’arrancaera y subir xuntos. A midiu día seguía embazacao y la nieve asomó’l focicu pelos altos; bien temprano, ensin ponese d’acuerdu, yá taben toos de vuelta en Collanzo y apenes paroren.
Pasaron trotiando La Barraca, Carpienzo, Llamas, Rumañón, Casomera y La Paraya. Cuando llegaron a Les Foces de Roayer, yá floriaba; y cuando pasaben per Otambo, nevaba a trepu zarréu.
En Roayer, pedrera arría, aunque yeren pocos, aquello paecía un reximientu de caballería; atravesaron el puiblu de baxo arría y nun quixeron parar na tabierna, porque aquello taba ponién dose mui feo; cuando diben pela Sierra Les Alandrines, ya comencipiaba a cubrir; y, en L’Arenal, yá se vía la guelga, que ca vez se facía más fonda al pasu pela Casa’l Monte y Talabarda; La Cuesta del Penón yá taba mala de subir; y per E1 Carbayalín llegába yos la nieve pela ruiya a los caballos.
La estampa yera perguapa, pero metía mieo. Taben toos callaos, pero pensaben lo mismo: con aquella
enverná y con cuatro filos de yerba na tená, nun se sabía lo que pasaría.
Diba delantre’l tíu Celestino, coriosín, arrolléu na so manta, col paragues na mano izquierda y el ramal de la cabezá na derecha; detrás diben los otros cuatro de la mesma fegura; y, cuando diben a vadiar el reguerón de Fonfría, el caballo del Tíu Celestino dio un rinchíu suave y afoguéu, como de mieo; y, má avistar Fonfría, plantóse y puénxose a temblar; los demás fixoren lo mesmo.

Cencerrín