Gallinal - Asturias

Perdonaime,tóo ye groma
Del magüestu que vos fala.
!Ay,probinos!pa utra cosa
esta fiesta fue'ntamada.
Paxaros,flores y neños
facen reviciar el alma
fuxendo llercies,llaceries,
dolor,llantu,pena,llácara
y semando d'llegries
la vida que ye una llárima.

Cátigu que na'spesura
saltarín páxaru'ntama
llanciando al sol gorgorinos,
pa la fema'namorada.
arume de belles flores
na solez de la'nramada
que 'l vientu se lu lleva
y suavin,muy suave lu aña;
caricies del guapu neñu
que na so melosa fabla
fainos rir a tutiplén
y de oyelu cai la baba...

Son querencies de la vida,
ye amor,poesía,alma,
ye 'lsentir de los humanos,
ye vevir la paz y calma,
ye tóo xunto l'allegría
que del cielu vien per gala.

!Ay probinos los mios neños
rapazos de la Calzada!
Ya teneis vuestru xardín
onde reblincar con gana;
ya teneis flores y árboles
que sol mar y brisa baña..
Sois felices,muy felices
ena inocencia del alma.
Si algún día yo veyín,
(non en balde 'l tiempu pasa)
cimblau co la carga a cuestes
que los años sofitara
tembeque mediu cieguín,
con el alma atristayada
de sufrir y padecer,
de luchar na vida amarga,
subiera arrastraes los pies
fast'aqui fasta la Calzada,
dexaime tomar el sol
nel xardín de la neñada
al par de les belles flores
ena querida barriada,
mientres blincais xuntu a min
riyendo a toda la gracia
y los páxaros allegres
canten amor y esperanza..

¿Dexareisme miós neñinos,
rapazos de la Calzada?