Gallinal - Asturias

Toi rucando los dientes de coraxe,

ximielgando nel aire la cibiella,

llanciando un ¡xuxú! provocativu

con barruntos nel cuerpu de quimera.



¡Arrepáresme bien!, ¿mires quién soy?,

soy Pachín de Melás, el de Sotera,

qu'oyéndome gufar enfurecíu

cinco veces fuxó de min la güestia.



Soy el gallu, ¡sandiez!, de la quintana,

pos lo mesmo en magüestu que n'andecha,

n'entrando Pachín falando arrecio,

¡adiós mundu!, podéis atar la llengua.



A Pinón del Bardial por char de ronques

desficii el focicu el di la fiesta

y batielu además d'una mocada

¡cibiellazos!... son gala pa'l babieca.



Con que asín, rapazacu, munchu güeyu;

y si acasu pasares per mio vera,

asepárate muncho, ponte lloñe,

qu'el fueu de los mios güeyos da ceguera.